________________________________________________________________________________ 

   <<<  UNN JETZERT WIDDER NEI !!! DIE PALZ - POSCHT AUSGAAB NUMMER ACHT  >>> 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 
________________________________________________________________________________ 
________________________________________________________________________________ 

                                 Ausgabe 8/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Hotzeplotz, Schtummel, Tschingel-Belz 

-------------------------------------------------------------------------------- 

                        Unser Motto vun dere Woch hääst: 

          <<<< Glickwunsch an all, die wu's schunn hinner sisch hänn! >>>> 

-------------------------------------------------------------------------------- 

                                 - Aktuelles - 

Zuerscht mecht ich mol uff die Ummfrooch oigehe: 
     Erscht mol Merrsi, dass sich iwwerhaupt jemand uff die Ummfrooch hie 
     gemeld hot, 's waren immerhin zwää Leit, also besser als garnimmand. 'S 
     sinn bis jetzert iwwer ZEHN (10!!!) Vorschlääch oigange, alldieweil de 
     wahrschoins fleisigschde Palz-Poscht-Leser mehrere Vorschlääch abgewwe 
     hot (wer 's is kinnen ehr bei de Witze nochlese...). Naderlich war er jo 
     net de ähnzigschd Palz-Poscht-Leser, wu Vorschläch abgewwe hot. Desdeweche 
     mecht ich mich ach noch bei Sebastian Zipp (bek. als ZIPP) bedanke, da ach 
     er Vorschlääch abgewwe hot (Dankschää!). 
     Trotzdem sinn noch weitere Vorschläch willkumme, die mer in de ZEHN-te 
     Palz-Poscht dann zur Abstimmung stellen. Dass dann ach megligscht viel vun 
     eich teilnemmen, dun mer de Palz-Poscht ä annres Aussehe verbasse un dun 
     de Abstimmungsmechanismus ach so ähfach wie 's nur geht gschdalde. 
Neie Rubrike: 
     Ach sinn bei uns Vorschlääch iwwer neie Palz-Poscht-Rubrike oigange, die 
     wu mer dann in de nekschde Palz-Poscht-Ausgawe präsendieren. Also sein mol 
     gschpannt, 's werd sicher inderessant. Weitere Vorschlääch fer neie 
     Rubrike sinn naderlich erwinscht, ach Vorschlääch fer e neies Erschei- 
     nungsbild vun de Palz-Poscht (wann net lossen mer uns was oifalle, awwer 
     ob eich dann des gfallt...? , mer wern's säähne). Vorschlääch wie immer an 
     REDAKTION@PALZ-POSCHT.DE 
So, des war's jetzert vorerschd, also dann noch viel Schbass beim Lese winscht 
eich die 
       Walz vun de Palz 
       un soi Tiem 

-------------------------------------------------------------------------------- 

                           - Pälzer Sprochpriefung - 

Was, die Ufflesunge vun de letschte Ausgaab wollen ehr ach widder wisse? 
Alla gut... 

- Jeder halbwechs verninfdische Pälzer wääß, dass e Biffee en Wohnzimmerschrank 
  is. Wenn jetzert änner saacht, des is doch die pälzisch Aussproch vun 
  "Buffet", dann hot er naderlisch ach rescht. 
- Okee, des nekschte missen ehr net ubedingt wisse, awwer 's is gut, wenn ehr's 
  mol gehehrt hänn: Krutzisch sinn Rieweblätter, ganz efach. 
- Un e Kaut is e Kuhl, odder um e besseres Wort zu benitze (fer all die, die wu 
  im Hochdeitsche net so bewannert sinn), e flaches Loch im Bodde. 
- Un was Persching hääßt, des wissen ehr hoffentlich all. Persching sinn halt 
  Persching, do gebt's kä anner Wort defier. Fer die wu des jetzert net wisse 
  dun, en klääne Tipp: En Persching kann mer esse; 's bleibt also vun unsre drei 
  gewenne Mechlischkeite nimmie so viel iwwrisch. 

-------------------------------------------------------------------------------- 
Unn do sinn widder vier neie (ospruchsvolle) Sache: 

Machulles:  ( ) Bankrott                      dimmle: ( ) ausklopfen 
            ( ) Störenfried                           ( ) donnern 
            ( ) Glücksfall                            ( ) dämmern 

Gäschtsche: ( ) Gast                          Marau:  ( ) Maria-Auguste 
            ( ) schlecht erzogenes Kind               ( ) Majoran 
            ( ) Kastanien                             ( ) Feuchtgebiet 

-------------------------------------------------------------------------------- 

                      - Pälzer Schimpfwerder, Dääl 4 - 

Wie isch eich kenne du, hänn ehr bschdimmt uff die nekschte Werder gewaad, 
desdeweche habb isch do widder e neii Lischt fer eich uffgschdellt, alldieweil 
ehr jo immer schää lerne sollen, gell! 
  

Hohlwambe:     In denn geht immer noch ebbes noi, vor allem die drei pälzer 
               W: Weck, Worscht un Woi. 

Knochefligger: Uuzname fer en ausgebildede Mediziner, hier Dr. med.. 

Quertreiwer:   Wann der so änner begechne dut, guck das de devu kummscht, 
               alldieweil des en Schpielverderber is. 

Schnorrer:     Im Allgemeine is des än Schmarozer, der sich uff de Koschde vun 
               de annre Leit durchs Lewe schlache dut. 

Truschel:      Des is e kläänes dickes Froleinsche, des net arch attraktiv 
               aussääne dut. Zu demm Iwwel dezu isses ach noch e lahmie Ent. 

Xundheitsaposchdel: Des is nix annres als en Ökofuzzi, der wu mit 
                    Birkestock-Sandale soi Bimbes im Jutesäckl ins Reformhaus 
                    transportiere dut. 
  

So, isch hoff, ehr hänn widder ebbes Neies gelernt, denn lerne duschd ä 
Lewe lang, ob's mekscht odder net. Alla hopp, die nekscht Lischt kummt 
bschdimmt, awwer nix iwwersterze... . 

-------------------------------------------------------------------------------- 

Alldieweil jo manche vun eich die Woch Abidur gschriwwe hänn (odder noch 
schreiwen), wollen mer eich jetzert mol e bissl uffheitre. Desdewesche gebt's 
heit mol zwää Witze: 

"Unn, beißen se die Fisch?", mecht de Maier Kurt vum Sepp wisse, als der 
demm beim Fische zugugge dut. Dodruffhie antworded de Sepp: "Du kannscht 
se jo mol schtreichle, Kurt..." 

E Fraa kummt uff die Bank un will Geld oizahle. Froocht der 
Bankohgschdellte: "Ja, hänn Si ach e Konndo?" Mähnt die Fraa: "Wieso, 
gebt's do heit Worschtsupp?" 

Zu dem letschte Witz missen mer jetzert mol e Omerkung mache, alldieweil der net 
vun uns is. Den hänn mer nemlisch vun unserm (wahrschoins) treueschde Leser 
kriescht, un zwar is des de Stefan Weis. Mer bedanken uns hiermit ganz herzlisch 
bei ihm un hoffen, dass er ach weiterhin so begeischterter Palz-Posch-Leser 
bleibt. 

-------------------------------------------------------------------------------- 

Des wars jetzert widder vun unsre Seit, vielleischt hänn ehr jo mol e paar 
Minute Zeit un schicken uns e korzi E-Poscht, wie ehr die Palz-Poscht iwwerhaupt 
finne. 
Alla hopp, bis dann, 
   Eier Walz vun de Palz 
   un soi Tiem. 

ZURÜCK ZUR ARCHIV-ÜBERSICHT