________________________________________________________________________________ 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 
________________________________________________________________________________ 
________________________________________________________________________________ 

                                 Ausgabe 7/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Hotzeplotz, Schtummel, Tschingel-Belz 

-------------------------------------------------------------------------------- 

                        Unser Motto vun dere Woch hääst: 

              <<<< Pälzer kinne beim Abidur gar net versaache. >>>> 

-------------------------------------------------------------------------------- 

So, die Oschterfeierdaache sinn rum, 's werd widder Zeit fer e neie Ausgaab vun 
de allseits so beliebte Palz-Poscht. 
Desmol gebts am Ofang eischentlisch net viel zu saache, also fange mer glei o: 

-------------------------------------------------------------------------------- 

                                - Ummfrooch - 

'S erscht mol vielen Dank (Merrsi!) fer die iwwerweldichende Teilnahme, mer hänn 
uns vor lauder Zuschpruch kaum noch redde gekinnt. Do sinn jetzert die viele 
Vorschlääch, wu an uns gericht wore sinn: -------------------------- 
Uffgrund dere iwwerweldichende Teilnahme machen mer uns rischtisch Sorche, ob 
ehr iwwerhaupt die Palz-Poscht rischtisch lese dun un denken desdeweche iwwer e 
Oistellung (Einstellung, Aufgabe, Absetzung, damit ihr dass auch alle versteht, 
ja!) vun de Palz-Poscht noch, alldieweil mer uns die Mieh (Mühe) jo schließlich 
net ummesunscht mache dun. Mer glaawen jo immer noch ans Gute im Pälzer (also in 
eich) unn lossen desdeweche die Ummfroch mol noch zwää Ausgawe weiderlaafe um 
eich e Schonz (Chance) zu gewwe mitzumache un die Palz-Poscht so vor ehrm Enn zu 
bewahre (Isch glab isch muss eich mol zeiche wu de Battl de Moscht holt!). Falls 
ehr die Ummfrooch nimmie im Kopp hänn dun mer 'se eich do nochmol mitschicke: 

Do nochmol extra die E-Poscht-Adress fer Vorschlääch: REDAKTION@PALZ-POSCHT.DE 

Sehr geehrde Palz-Poscht-Leserinne un Leser, 

mer, die Palz-Poscht-Redaktion, hänn e kläänes Problem, alldieweil mer e Form 
fer die Mehrzahl vun de Werder (Wörter) E-Poscht unn Palz-Poscht suchen. Mer 
hänn uns vorloifich fer die Werder E-Poschts un Palz-Poschts entschiede, wären 
awwer fer jeden Vorschlach dankbar, denn ehr zu demm klääne Problem mache 
kinnden. Die beschde Vorschlääch dun mer dann in de nekschde Palz-Poscht ver- 
effentliche, wann ehr wenn ach mit eierm Name (ehr wenn dann beriehmt, awwer nur 
wann ehr des winsche dun, desdeweche schreiwen uns dann mit eire Vorschlääch ob 
ehr namentlich genannt werre wenn). Also schreiwen schää eier Vorschlääch an 
Redaktion@Palz-Poscht.de, mer sinn gschpannt, was ehr zu demm Problem määne dun. 
Aller dann schunn mol Danke im Vorraus fer eier zahlreiche Vorschlääch, 

die Walz vun de Palz un soi Tiem 

So, dess war jetzert die wischtisch Mitteilung vun de Walz vun de Palz un soim 
Tiem un isch hoff, ehr dun's eich zu Herze nemme, ehr wissen jetzert schließlich 
was uff'm Schpiel steht! 
Trotz demm klänne Hinweis noch viel Schpass beim Weiderlese! 
(Omerkung: E E-Poscht zu tippsle un ach noch zu verschicke dauert ca. 5 Min, e 
Zeit, die merr, wie isch mään, ruich mol in die Palz-Poscht inveschdiere kann) 

-------------------------------------------------------------------------------- 

                           - Pälzer Sprochpriefung - 

Jetzert muss isch doch erscht emol gucke, was mer eich letscht Woch iwwerhaupt 
gfroocht hänn. - Ah, do isses jo! - also do sinn die Ufflesunge vun de sekste 
Ausgaab: 

- En Beischlääfer is enner, der helft bei Feschte un anre Feierlischkeite. Der 
  hääßt so, alldieweil der immer alles beschlääfe muss, zum Beischpiel schwere 
  Bierkischte un so Sache. 
- Isch hoff zumindescht emol, dass ehr all gewisst hänn, dass en Ranze en Bauch 
  is (isch muss awwer zugewwe, wenn enner en ziemlisch große Ranze hot, dann 
  kinnt mer des ach mit Fett iwwersetze). 
- Un wenn die Großmutter vor lauter zittrische Händ de Faade nimmie dorchs Loch 
  vun de Nodel bringt, dann dut se debei verzwazzle. 
- Un des kennen ehr beschtimmt ach: Wenn änner mol widder ken Gertel fer die 
  Hoos ohot und die desdewesche soweit runner rutsche dut, dass mer soin Hinnre 
  sieht, dann hot der en blotte Hinnre. 

-------------------------------------------------------------------------------- 

Ehr machen's em gar net efach, awwer isch hab nochemol vier neie Sache gfunne: 

Biffee:  ( ) kleine Wurst            Krutzisch: ( ) Fensterkreuz 
         ( ) Wohnzimmerschrank                  ( ) Rübenblätter 
         ( ) Büffel                             ( ) Überrest 

Kaut:    ( ) Festtagsfrack           Persching: ( ) amerik. Rakete 
         ( ) Kuhle                              ( ) Gemeindeschreiber 
         ( ) Kauz                               ( ) Pfirsich 

-------------------------------------------------------------------------------- 

Pälzer Schimpfwerder, Dääl drei: 

Wie ehr jo sääne kinnen, waren mer ach die Woch widder fleisich gewesst un hänn 
eich widder e paar neie Werder zammegschdellt. Awwer net vergesse: immer schää 
lerne un ach owende. 
  

Allmoi:         Än Allmoi is äner, wu alles fer sich oinemme mecht un ach dut, 
                immer schää noch demm Motto: Alles is moi. 

Chrischtkindel: Des is e ganzschää oifeldichi Person, dere kannscht alles 
                verzehle un wannd' was vun 're mekscht, dann kriegscht des ach. 

Dorfbaas:       Ä Dorfbaas is meischt e weibliches Wese, wu ehreamtlich die 
                neieschde Dorfnochrichde verbreide dut, desdeweche kannscht der 
                ach die Landesschau im Dritte Programm schpaare. Merr bezeichnt 
                e Dorfbaas ach als Dorfrätsch odder Dorftrummel, die immer 
                getreu ehrm Motto: "Hoscht schunn gheert...?" vorgehe dut. 

Erbsezähler:    Annri Bezeichnung fer en Spääbrenner. 

Graf Rotz:      De Graf Rotz, des is en ganz arch oigebilde Kerl, der määne dut, 
                er weers. 

Hosseschisser:  Än Hosseschisser is e ganz feichi Person, die wu määner Schiss 
                als Mut hott. Allgemein ach als Angschthas bekannt. 
  

So, des waren jetztert mol die Werder fer die Woch, ball gebt's widder neie. 

-------------------------------------------------------------------------------- 

Un wie immer jetzert e luschtisch Gschischtl: 

De Dokder dut seim Patiende die Alkoholgfahre erkläre: "Wissen se", 
saacht der zum Patiende, "isch muss Sie oidringlich warne, de Alkohol 
verkerzt ehr Lewe." - "Des schtimmt", saacht de Patiend, "die Zeit an de 
Thek vun de Schtammkneipp isch immer so schnell vorbei..." 

-------------------------------------------------------------------------------- 

Wort vun de Woch fer Insaider: < Drei Minutte und finfeferzisch Sekunne. > 

Un jetzert e Wort an alle Abituriente vum LG (un ach vun anre Schule): 
Mer winschen eich viel Glick in de nekschte zwää Woche un hoffen, dass ehr's all 
gut iwwerstehe dun. Un ehr wissen jo, zu viel lerne bringt ach nix, liewer e 
Rund driwwer schlofe, dann sieht die Welt viel besser aus. 
Fer all die, die wo jetzert nach dene uffmunternde Worte immer noch tiefe 
Sorschefalte hänn, en Tipp vun mer: 
Lesen eich nochemol die letschte seks Ausgaawe vun de Palz-Poscht dursch, 
trinken ääner un lachen e bissl, un ehr wärrn sähne, es werd widder viel heller. 

Also, viel Glick fer alle, 
    Die Walz vun de Palz, 
    Schtummel, 
    Tschingel-Belz, 
    Hotzeplotz. 

ZURÜCK ZUR ARCHIV-ÜBERSICHT