________________________________________________________________________________ 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 
________________________________________________________________________________ 
________________________________________________________________________________ 

                                 Ausgabe 6/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Schtummel, Tschingel-Belz, Hotzeplotz 

-------------------------------------------------------------------------------- 

                        Unser Motto vun dere Woch hääst: 

          <<<< Pälzer trinken soviel Woi wie's Schnooke gebt am Roih. >>>> 

-------------------------------------------------------------------------------- 

Alldieweil jo des Wochenende Oschtern is, wolle mer die Geleschenheit hier 
nutze, um alle Palz-Posch-Leserinne un -Leser frohe Oschtern zu winsche. Mer 
hoffen, dass de Oschterhaas ach des Johr widder brav is un geniechend Eier 
mitbringt. 

Nochemol zur Erinnerung, hier sinn unser neie E-Poscht-Adresse: 

- Abo@palz-poscht.de, wenn ehr die Palz-Poscht abonniere wolle 
- Kontakt@palz-poscht.de, wenn ehr Kontakt mit anre Pälzer suchen 
- Vorschlag@palz-poscht.de, wenn ehr Vorschlääch fer Ardikel 
- Redaktion@palz-poscht.de, wenn ehr uns irschendwas mitzudääle hänn odder 
  Beschwerde gesche de Oschterhaas vorbringe wollen. 

Un do nochemol die Private Adresse vun unsre Redaktöre: 

-Walz-vun-de-Palz@palz-poscht.de 
-Hotzeplotz@palz-poscht.de 
-Schtummel@palz-poscht.de 

-------------------------------------------------------------------------------- 

                            -Pälzer Sprochpriefung- 

Erscht emol gebts die Lesunge vun de Palz-Poscht (5): 

-En Krottegiekser is e stupfes Messer, mit dem mer nix mää gscheits ofange kann. 
-Un e Baus du isch hawwe, wenn isch irschendwu dewedder gerennt bin, des is also 
 e Beul. 
-Botschamber is efach en Nachttopp, der bei em gute Pälzer immer noch unnerm 
 Bett steht (Hust, Hust!) 
-Un wenn s Esse so en rischtisch fade Gschmack hot, dann isses lebsch. 

-------------------------------------------------------------------------------- 

Un, wie kanns annerscht soi, jetzert gebts die nekschte vier Sache: 

Beischlääfer: ( ) Hausfreund                   Ranze: ( ) Bauch 
              ( ) schläft beim Arbeiten ein           ( ) Fett 
              ( ) Helfer bei Festen                   ( ) männl. Wildschwein 

verzwazzle:   ( ) verwechseln                  blott: ( ) gebündelt 
              ( ) verzweifeln                         ( ) nackt 
              ( ) zerreden                            ( ) blaß 

-------------------------------------------------------------------------------- 

Luschdische Zeiche, Dääl zwää 

So, ehr Palz-Poscht-Leserinne un -Leser, do is de mit Schpannung vun eich, 
zumindescht vun manche, erwardede zwätte Dääl vun unsere Serie, die do hääße 
dut: Luschdische Zeiche. Alla hopp, dann viel Schpass beim lese un owenne! 

{:-)  Des Zeiche hääßt, dass de Schreiwer kää, odder zumindescht net so arch 
      viel Hoor uff Kopp hot, so dass der e Toupee trache dut, alldieweil de 
      Schreiwer sich wahrscheins schämme det. 

}:-(  Unn wann de Schreiwer des Zeiche benutze dut, dann is soi Perrick in em 
      Zustand, denn merr als "unner aller Sau" bezeichne dut. 

:-#   Des Zeiche trifft meischt uff jingere Schreiwer zu, alldieweil bei denne 
      noch die Zääh gerricht werre missen un die desdeweche e Zoohschpang 
      draache dun (ach unner dem Name "Fressgitter" bekannt, mer wollen des 
      awwer jetzert net weider ausfiere...). 

:-)-8 Des Zeiche dun Schreiwer vun E-Poschts net verwende, alldieweil des Zeiche 
      nemlich hääßt, dass de Schreiwer e Fraa is un des det jo net so arch gut 
      passe (merr wääses net...). Desdeweche dun des Zeiche nur Schreiwerinne 
      verwende, awwer Vorsicht, net dass ehr do vun em Kerl uff's Glatteis 
      gfiert werrn unn ehr eich dann do vergebliche Hoffnunge mache dun..... ;-) 

8:-)  Un wann die Schreiwerin vun de E-Poscht noch e bissl klääner is, dann 
      is se jo wahrscheins e kläänes Mädel un dut dann des Zeiche verwende. 

+-:-) Wann ehr vun so em, der wu des Zeiche verwende dut, e E-Poscht kriechen, 
      dann wissen ehr ähns: de Schreiwer is zwar wahrscheins net de Papscht 
      awwer irchend e annres kerchliches Amt hotter schunn inne, korz: de 
      Schreiwer is en Geischtliche 

:-*   Des Zeiche bedeuted, dass de Schreiwer de Empfänger odder die Empfängerinn 
      vun dere E-Poscht wahrscheins gern abknutsche det (iwwer E-Poscht is des 
      halt praktisch, alldieweil do net gleich e kerperliche Gewaltreaktion vum 
      Empfänger odder vun de Empfängerinn folche kann...). 'S kann awwer ach in 
      demm Sinn gebraucht werre, dass de Schreiwer demm Empfänger odder der 
      Empfängerinn mitteile mecht, dass der denn odder die gern hott un als 
      guten Freund odder Freundinn bezeichne dut, denn wie hääßts in de Werwung: 
      Guten Freunden gibt man doch ein Küsschen... . Jedoch falls de Schreiwer 
      un de Empfänger vun de E-Poscht 's gleiche Gschlecht hänn, dann kann des 
      ach annerscht ausgelecht werre, mer mechten des awwer jetztert net gar 
      soweit ausfiehre, desdeweche machen eich mol selwer eier Gedanke. 

So, ehr Palz-Poscht-Leserinne un Leser, jetzert sinn ehr widder e bissl schlauer 
wore un missten eichntlich wisse was die klääne luschdische Zeiche in de 
Privat-E-Poschts zu bedeute hänn. Jedoch gibt's ball widder en weidere Dääl, 
denn die Lischt mit de klääne luschdische Zeiche is noch lang. 

-------------------------------------------------------------------------------- 

Un jetzert widder en Anti-Saarlänner-Witz :-) 

E Grupp Pälzer un e Grupp Saarlänner fahren mitm Zuuch. Jeder Saarlänner hot e 
Fahrkaart, awwer die ganz Grupp Pälzer hot nur ä Fahrkaart zusamme. 
Dann ruft en Pälzer: "De Schaffner kummt!", un alle Pälzer zwängen sisch in ä 
Toilett. De Schaffner kontrolliert zuerscht die Fahrkaarte vun de Saarlänner un 
sieht dann, dass s Klo besetzt is. Er kloppt an die Deer vum Klo un saacht: "Die 
Fahrkarte bitte!" Änner vun de Pälzer schiebt dodruffhie die änzigscht Fahrkaart 
unner de Deer durch un de Schaffner zieht zufriede ab. 
Uff de Rickfahrt dun die Saarlänner beschließe, de selwe Trick ozuwende un 
kaafen norre ä Fahrkaart fer die ganz Grupp. Dann sinn se awwer ganz verwunnert, 
als se sehn, dass die Pälzer desmol gar kä Fahrkaart gekaaft hänn. 
Widder ruft en Pälzer: "De Schaffner kummt!". Sofort schterzen alle Saarlänner 
ins ände Klo, die Pälzer machen sisch e bissl gemächlischer uff de Weesch zum 
anre Klo. Bevor de letschte Pälzer die Toilett betrete dut, kloppt er an die 
Deer vun de Saarlänner un saacht: "Die Fahrkarte bitte!" 

-------------------------------------------------------------------------------- 

Ummfrooch: 

Sehr geehrde Palz-Poscht-Leserinne un Leser, 

mer, die Palz-Poscht-Redaktion, hänn e kläänes Problem, alldieweil mer e Form 
fer die Mehrzahl vun de Werder E-Poscht unn Palz-Poscht suchen. Mer hänn uns 
vorloifich fer die Werder E-Poschts un Palz-Poschts entschiede, wären awwer fer 
jeden Vorschlach dankbar, denn ehr zu demm klääne Problem mache kinnden. Die 
beschde Vorschlääch dun mer dann in de nekschde Palz-Poscht vereffentliche, wann 
ehr wenn ach mit eierm Name (ehr wenn dann beriehmt, awwer nur wann ehr des 
winsche dun, desdeweche schreiwen uns dann mit eire Vorschlääch ob ehr 
namentlich genannt werre wenn). Also schreiwen schää eier Vorschlääch an 
Redaktion@Palz-Poscht.de, mer sinn gschpannt, was ehr zu demm Problem määne dun. 
Aller dann schunn mol Danke im Vorraus fer eier zahlreiche Vorschlääch, 

die Walz vun de Palz un soi Tiem 

-------------------------------------------------------------------------------- 

'S Wort vun de Woch fer Insaider lautet desmol: < Foto - Säschn > 

So, an dere Stell kännen mer eich schunn emol rischtisch hääß mache: 'S dauert 
nimmie so arisch lang, dann gebt's die Palz-Poscht-Hoompäidsch. Im Moment sinn 
mer kräfdisch am Werkle, dass mer so schnell wie meschlisch fertisch wärre. 
Mer schätzen, dass mer eich mit de nekschte Ausgaab vun de Palz-Poscht ach unser 
Hoompäidsch präsentiere känne, also sein gschpannt! 

E schäänes Oschterwochenende winscht Eich 

      Die Walz vun de Palz 
      un soi Tiem. 

 

ZURÜCK ZUR ARCHIV-ÜBERSICHT