________________________________________________________________________________ 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 

________________________________________________________________________________ 
________________________________________________________________________________ 

                                 Ausgabe 5/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Schtummel, Tschingel-Belz, Hotzeplotz 

-------------------------------------------------------------------------------- 

                        Unser Motto vun dere Woch hääst: 

                   <<<< Uff die Bääm, die Schwobe kummen! >>>> 

-------------------------------------------------------------------------------- 

So, erschtmol gibt's e paar Sache bekanntzugewe: 

1.) S gibt neie E-Poscht-Adresse un die hääßen wie folscht: 
    - Abo@palz-poscht.de 
    - Kontakt@palz-poscht.de 
    - Vorschlag@palz-poscht.de 
    - Redaktion@palz-poscht.de 

    Dodezu gibts jetzert noch e paar Amerkunge: 
    Wenn ehr die Palz-Poscht iwwer zwanzisch Ecke krieche dun, kennen ehr 
    jetzert uns mehle, domit mer dann eier Adress hänn. Dann kriechen ehr ab de 
    nekschte Ausgaab die Palz-Poscht direkt vun uns zugemehlt. 
    Dodefier nemmen ehr bitte (jo, des Wort gibt's ach bei uns!) die Adress 
    Abo@palz-poscht.de . 
    Un wenn ehr Vorschlääsch fer Ardikel oder sunschtische Sache hänn, dann 
    mehlen uns unner Vorschlag@palz-poscht.de . 
    Um de Redaktion was mitzudääle is die Adress Redaktion@palz-poscht.de . 
    Zum Schluss gebts noch die Adress Kontakt@palz-poscht.de. Die kennen ehr 
    amehle, wenn ehr eich 's Herz ausschitte wollen oder efach nur mit e paar 
    anre Pälzer redde wollen. 

2.) Hääner's Bedirfnis, direkt mit äm vun unsre Redaktöre zu spreche, dann 
    gebts jetzert ach private Adresse: 

    Walz-vun-de-Palz@palz-poscht.de 
    Hotzeplotz@palz-poscht.de 
    Schtummel@palz-poscht.de 

Des wars awwer jetzert mit dem Gschwafel. Alleweil geht's rischtisch los: 

-------------------------------------------------------------------------------- 

                          - Pälzer Sprochpriefung - 

Die Ufflesunge vun de letschte Ausgaab gibts naderlich widder zuerscht: 

-Andifdisch sinn Endivie un sunscht nix. 
-Un en Bettsächer is net Bloseleide oder sowas in die Rischdung, sondern 
 Lewezahn. 
-En Storzelbock is en Porzelbaam un hot nix mit Worzle zu du. 
-Un wenn änner lang un dinn is, dann is er en Schlackel. 

-------------------------------------------------------------------------------- 
Unser vier neie Sache hänns ach widder in sisch: 

Krottegiekser: ( ) Ruf von kleinen Kröten        Baus:  ( ) Laus 
               ( ) Bremse (ein Insekt)                  ( ) Pause 
               ( ) stumpfes Messer                      ( ) Beule 

Botschamber:   ( ) deutscher Sekt               lebsch: ( ) glitschig 
               ( ) Nachttopf                            ( ) fad 
               ( ) Teigschüssel                         ( ) locker 

-------------------------------------------------------------------------------- 
Un jetzert widder änner vun unsre beliebte Witze: 

"Wie is'n de erschde Salzweck uff Ameriga kumme?" mecht de Heiner gern 
wisse. Die Leit guggen sisch all ganz dabbich o. "A forzdrugge 
naderlich." 

-------------------------------------------------------------------------------- 

Pälzer Schimpfwerder, Dääl zwää: 

So, do hämmer e neii Lischt mit Pälzer Schimpfwerder, die wu ehr dann 
schää lerne kinnen. Desdeweche sinns ach immer bloß sekse, damit ehr eich 
net soviel ins Hern noidrigge missen. So, dann lernen un lesen jetzert 
mol schää. 

Bagaasch:      Des is e Grupp vun Leit, die äm meischt uogenehm un nervend 
               sinn; ob mit odder ohne Gepäck is awwer egal. 

Bambel:        Än Bambel is äner, der wu arch nochlässisch un uzuverlässisch is. 
               Ach werd der unner de Bezeichnung Bambelarsch odder Bambelhannes 
               gfiert, 's hääst awwer alles 's selwe. 

Spääbrenner:   Än Spääbrenner is en ganz geiziche Kerl, der wu iwwerall 
               knausre dut, zu vergleiche mit'm Unkel Dagobert. 

Stadtschisser: Än Stadtschisser is äner, der wu aus de Großstadt 
               Sunndagsausfliech in de Pälzer Wald unnernemme dut. Der 
               Begriff werd naderlich ach fer annre Sunndagsausfliechler aus 
               unnerschiedliche Ballungsgebiete benutzt. 

Wiehldeiwel:   Än Wiehldeiwel is nix annres als en Uhruh, der immer ebbes 
               zu schaffe hawwe muss. 

Zorniggl:      Än Zorniggl, des is en ziemlich leicht zu erreechende Mensch. 
               Jähzornich isser ach noch dezu, also net so en luschtische un 
               frehliche Zeitgenosse. 

So, des waren die nekschde seks Werder gewesst, awwer ehr wissen jo: die 
nekschde kummen bschdimmt. 

-------------------------------------------------------------------------------- 
Un jetzert widder nei! Geschtern noch uffm Platz, heit schunn in de Palz-Poscht: 
De neie Berischt vum Bädminden-Klassiker in Neischtadt vun unserm Schreiwer 
Schtummel: 

Hallo ehr Leits! 

Isch saachs eisch ... des war e Rewoonsch! Ehr wissen net, vun was isch red'? 
Naderlisch vun unserm Rickspiel beim Bädminden. Mer hänn uns mol widder im Point 
getroffe, um die Siescher zu kiere. Un alldieweil sisch mansche Persone demit 
briskiert hänn, alle Schpiele am letschte Freidaach gewunne zu hawwe (gell 
Fräulein R.), hämmer nochemol die gleische Paarunge gescheniwwergschtellt, um zu 
sehe, wer wirklisch 's beschte Tiem is. 

Tja, un ogfange hot alles widder mit de folschende Paarunge: 
Sandra R. und Christian R. gesche Susanne S. und Dennis G. 
Erinnern ehr eisch noch? Des Schpiel is letscht Woch mit 15:13 fers Tiem 
Sandra/Christian ausgange. Un desmol hot die Sandra un de Christian noch en 
Brocke druffgelescht: Sie hänn konrolliert mit 15:10 gesche die Susanne S. und 
de Dennis G. gewunne! 

Dann s zwätte Metsch: Sandra R. und Dennis G. gesche 's Tiem Christian R. und 
Susanne S. 
Un des Gäim hot letschmol mit em glatte 15:1 Siesch fer die Sandra un de Dennis 
geend. Un ach desmol waren die Sandra un de Dennis - mit e paar ofänglische 
Probleme - 's dominierende Tiem. Sie hänn die Susanne und de Christian uff e 3:3 
an sisch ro gelosst, sinn awwer dann mit 14:3 devugezoche. Dann hänn de 
Christian un die Susanne nochemol zwää Mini-Pinktlscher gemacht. Awwer dodenoch 
hot die Sandra R. mit em Schmetterschlaach de Sack zugemacht: 15:5. 

Un zu guter letscht die Wiederholung vum Gschlechterkampf: 
Dennis G. und Christian R. gesche Susanne S. und Sandra R. 
Des Schpiel, des letscht Woch noch mit de Schmaach vun Cordoba geend hot, 
nemlisch mit änre 14:16 Niederlaach vum Monschter-Duo (ehr wissen hoffentlisch 
all, wen ich mään ;-)), war desmol e bissl ausgeglischener. Awwer de Christian 
und de Dennis wollten sisch net nochemol fertisch mache losse un hänn Gas gewwe 
(Om. vum Redaktör: Sunscht hätts vun mer jo ach widder e dabbisches Kommendar 
gewe, gell?). Awwer die Susanne und die Sandra hänn mithalte kenne un bis zum 
11:11 wars e ausgeglischenes Schpiel. Doch die letschte vier Punkte hänn de 
Dennis und de Christian gemacht un hänn schließlich mit 15:11 verdient gewunne. 

Widder war ma ziemlisch fertisch mit de Nerve un jeder hot ordentlisch 
gschwitzt und gekämpft. 
Desmol warn die Schpiele ziemlisch ausgeglischen und mer hänn uns gute 
Ballweksel geliefert. Und dann - ma kann sich's denke - ware mer widder 
devu iwwerzeischt: 

ACH DES WAR NET DE LETSCHTE GEMEINSAME WETTSCHTREIT!!!!! 

Eier Schtummel!!! 

-------------------------------------------------------------------------------- 

Un jetzert noch des Wort vun de Woch fer Super-Insaider: < Edelwaiß > 

Alleweil hämmers widder gschafft. 
Bis zum nekschte Mol un denken an unser Motto vun de Woch, 

                                        Eier Walz vun de Palz 
                                        un soi Tiem. 

ZURÜCK ZUR ARCHIV-ÜBERSICHT