________________________________________________________________________________ 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 

________________________________________________________________________________ 

________________________________________________________________________________ 

                                 Ausgabe 4/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Hotzeplotz, Schtummel, Tschingel-Belz 

-------------------------------------------------------------------------------- 

                        Unser Motto vun dere Woch hääst: 

                    <<<< Jetzert isch die Beer gscheelt. >>>> 

-------------------------------------------------------------------------------- 

                            Pälzer Sprochpriefung 

Wie ner des jetzert schunn gewähnt sinn, gibt's erschtmol die Ufflesunge vun de 
letschte Ausgaab (eischentlisch kennte mer uns die jo schbare, 's war sowieso 
viel zu leischt). 

- Jeder Audofahrer wääß, dass diesisch naderlisch trieb is. 
- En Schlabbe is än Hausschuh, oder ach allgemein än Schuh, awwer nix anres. 
- Un wenn de e Brot oschneide duscht, dann isses erschte Schtick 's Knerzel. 
- Rouches is, wenn änner bees zornisch is. 

-------------------------------------------------------------------------------- 
Un jetzert widder vier neie Sache: 

Andifdisch   ( ) Brautkranz             Bettsächer: ( ) Wärmeflasche 
             ( ) Endivien                           ( ) Blasenleiden 
             ( ) Vorspeise                          ( ) Löwenzahn 

Storzelbock: ( ) Baumstock              Schlackel:  ( ) Abwasser 
             ( ) Purzelbaum                         ( ) langer Mensch 
             ( ) Freudensprung                      ( ) Schlauberger 

-------------------------------------------------------------------------------- 

So, ehr Palz-Poscht-Leserinne un Leser, mer, die Palz-Poscht-Macher, hänn mol 
widder beschlosse e neii Rubrik in die Palz-Poscht uffzunemme, nemlich die 
Pälzer Schimpfwerder, damit ehr all wisse dun was ehr zu saache hänn wann ehr 
mol rischtisch dischbediere dun, un net lang nooch neie Ausdrick zu suche 
brauchen. Falls ehr noch Frooche hänn, missen ehr eich an unsern neie 
Mitarbeiter Tschingel-Belz wende, der kann eich dann wahrscheins weiderhelfe 
(odder awwer ach nett). 
Alla hopp dann, viel Schbass beim lese un owenne: 

Knoddelkärchler: Än Knoddelkärchler is änner, der wu mit seim Handwechelche in 
                 de Gechend rummdappt un Gaulsknoddle oisammle dut, alldieweil 
                 er die in de heitiche Zeit in seim oißerscht biolochische 
                 Gaadebau owende dut um dodemit de ganze Gaade zu dinge, merr 
                 kinndn also ach als en Griene bezeichne. Naderlich is des 
                 Schimpfword net positiv gemäänt, sondern eder im negative Sinn, 
                 alldieweil merr sich dann iwwer desjäniche luschtisch mache dut 
                 (= Ökofuzzi). 

Schlabbefligger: So nennt merr in de Palz die Schuhmacher, schpeziell die 
                 aus Pärmesens. 

Spinatwachtel:   Ä Spinatwachtel is kää Hinkl, sondern e komischi un meischt 
                 alti, uffgedackeldi Tunt. 

Spitzkligger:    Än Spitzkligger is än Sonderling un nix anres. 

Wonnebrunser:    Än Wonnebrunser, des is än Urinator im siebte Himmel, merr 
                 kinndn ach als Glickspisser bezeichne. 

Worzelsepp:      Än Worzelsepp is äner, der wu sisch am liebste vunn de 
                 Frichte un Beere ausm Pälzer Wald ernähre dut; frieher hot merr 
                 so Leit als Sammler bezeichnet (lang, lang isses her...). Ob 
                 unner die Kategorie ach die Eschtler fallen, dodriwwer kann 
                 merr sich schtreide, jedoch is manchem vunn eich sischerlisch 
                 's ä odder annre Exemplar bekannt. 

So, dess waren jetzert e paar Pälzer Schimpfwerder, die nekschte kummen 
bschdimmt. Ach die annre Serie dun mer naderlich ach fortsetzte, awwer immer 
äns nochem annre, un jo nett huddle. 
So, jetzert muss isch awwer uffheere, alldieweil %-). 

-------------------------------------------------------------------------------- 

Un jetzert widder en korze Witz fer zwischedorsch: 

"Kennen ehr des Audo, wu mer bloß barfisisch fahre derf, alldieweil merr 
sunscht en Uufall baue dut?" froocht de Schorsch. - "Näh, des dun mer net 
kenne." - Dodruffhie de Schorsch: "Ah des isch do klar wie Klosbrieh: 
Mit-Schuh-bisch-hie!" 

-------------------------------------------------------------------------------- 

Mer hänn uns gedacht, dass mer eisch Schportereignisse vun großer Bedeidung net 
vorenthalte kenne. Desdewesche gibts jetzert en Artikel iwwer e Bädminden- 
Schpiel vun unserm neie Mitarweider Schtummel: 

Tatzeit: Freidaach, de Änedreisigschte März vum Johr 2000 
Tatort:  Bädminden- Skwosch- un Tennis Senter "Point" in Neistadt 
Persone: Sandra R., Susanne S., Christian R. (ach bekannt als "Walz vun 
         de Palz") un Dennis G. 
Tatwerkzeische: vier harmlose Bädminden-Schlääscher un drei (!!) ihr End 
                vor sich sähnende Fedderbäll. 

16.56 Uhr: Nochdem Sandra R. un Christian R. schunn vor e paar Minute 
   oigetroffe waren, sinn alleweil ach die letschte beide Hauptdarschdeller 
   Susanne S. un Dennis G. am Point ookumme. 
16.59 Uhr: Alle vier Hauptverdäschdische gehn in die Spielhall, leschen ehr 
   Sache uff ehr Stiehl un fangen o, sisch uffzuwärme. Schtrecke hier, 
   dehne do (Om. vum Redaktör: des kann jo net so lang gedauert hawwe :-))... 
   un schunn konns losgeh. 
   Beim Oispiele hot ma ääschtimmisch un kollektiev erscht emol mit e paar 
   Schlääsch ogfange, die wu dezent am Ball vorbeigonge sinn oder so schlecht 
   gschpielt worre sinn, dass de Ball dort hiegfloche is, wu er net hiegsellt 
   het, nemlich ins Netz. Na ja, un als merr mitm Beschnuppere fertisch war un 
   uugfähr gewisst hot, wu die Schtärke un Schwäche vum anre lischen, hots 
   dann rischtisch losgeh kinne. 
17.21 Uhr: 'S erschte Metsch fongt o: 'S stehn sisch folchende Paarunge 
   gecheniwwer: 
   Sandra R. schteht an de Seit vum Christian R. un Susanne S. spielt Seit an 
   Seit mitm Dennis G. . 'S Spiel fangt o. Alleweil gibts kä Halde mää. Merr 
   schnauft un heschtet noch nooch fascht uuerreischbare Bäll. Nooch e paar 
   verkorkste Versuche vun Christian R., än Smesch zu schlache un e paar 
   glanzvolle Parade vun Dennis G. uff hervorrachende Schmedderbäll vun de 
   Sandra R., fiehrt's Tiem Susanne/Dennis reladiev schnell mit 12:5. Awwer 
   alleweil fangt die gnadelos Uffholjacht vum Tiem Sandra/Christian o. Die 
   werd oigeleit dursch ä fascht uufärie Oilaach vun de Sandra R.: Als Dennis G. 
   nach äm zu hoch oogsetzte Ball vum Christian R. zu äm kraftvolle 
   Schmedderball osetzt, sieht Sandra R., dass se denn Schlaach unner normale 
   Umschtänd NIE redurniere kennt un kreischt: "Oh Näää!". Un Dennis G., 
   sischtlisch schockiert un irritiert dursch den Oiwurf, schlacht naderlich 
   prompt denewe, wumit 's Uffschlaachrescht uffs Tiem Sandra/Christian 
   iwwergeht - un des war de Aafang vum End. Schnell sinn se mit 
   gefiehlvolle Schtoppbäll un harde Vor- un Rickhandschlääch, gesche die die 
   Susanne un de Dennis nix mache konnten, rokumme un schunn hots 12:13 
   gschdanne. Des warn also 8 Punkte in Folsche. Un nach äm Ehrepunkt vun 
   de Susanne unem Dennis zum 13:13 hänn dann Sandra R. un Christian R. de 
   Sack zugemacht un hänn ehrn 2. Metschball zum 13:15 verwannelt!! 
17.34 Uhr: Partnerweksel: Es schpielen jetzt Sandra R. un Dennis G. gesche 
   's Duo Susanne S. un Christian R.! 'S zwätte Metsch fangt o. Die Sandra un 
   de Dennis iwwerlossen freiwillisch 's Uffschlaachrescht dem geschnerische 
   Tiem. Awwer de Christian verliert gleisch wesche äm Uffschlaachfehler 's 
   Uffschlaachrescht. De Dennis G. hot jetzert de Balle. Er macht zwää 
   Uffschlaachgewinne un nooch drei dolle Ballwekseln, die awwer de Dennis G. 
   un die Sandra R. mit dolle Schtoppbäll un gute Schlääch aus de Defensiv 
   dominiern, un nach weitere drei Punkte, die de Dennis G. mit gute Smeschis 
   im Alläägang holt, stehts schnell 8:0 fers Tiem Sandra/Dennis. Dann awwer: 
   Nooch Uuschtimmischkeite im Tiem Sandra/Dennis, alldieweil de Dennis G. 
   endlisch mol widder die Sandra R. zum Zuuch kumme losset wollt un der 
   desderwesche demonschtrativ de Balle net schlacht un dodruffhie hofft, dass 
   die Sandra den onimmt, die des ach - wenn ach leider zu spät - dut un de 
   Balle drause landt, geht's Uffschlaachrescht endlich widder zum Tiem 
   Susanne/Christian iwwer. Awwer die kenne kään Profit draus schlache un machen 
   norre ään Punkt zum 8:1. Dann sinn die Sandra un de Dennis widder am Zuuch 
   - un alldieweil merr sisch jetzert besser abschpresche dut un sisch gut 
   uffänanner abschtimmt, klappt fascht alles, die Schlääch sinn prezies un 
   schnell un uhne Probleme un mitm bissl Glick holen sisch de Dennis G. un die 
   Sandra R. des Metsch mit ihrm erschte Metschball mit 15:1!! 
17.44 Uhr: 'S letschte Metsch - die letscht Paarung: Jungs gesche Mädels. 
   Die Sandra R. zusamme mit de Susanne S. gesche des Monschter-Duo Dennis G. 
   un Christian R. (Masseverhältnis 2 zu 4)! 'S letschte Metsch vum Daach kann 
   ofange. De Christian un de Dennis demonschtrieren ihr Pauer: De Dennis mit 
   harte Smeschis un de Christian mit hervorraachende Schtopps. Schnell fiehrt 
   mer - abgseh vun zwää rescht uuwischtische Pinktlscher vum anre Tiem - mit 
   9:2. Dann lossen de Christian R. un de Dennis G. die Ziechel e bissl locker 
   un denken: "Losse mer dem arme schwache (nocher leider vermeindlich schwache) 
   Gschlecht e klääni Schoons!". Un dursch schleschte Reaktionen vum Dennis G. 
   uff harte Schmedderbäll vun de Sandra R. un dursch Netzroller vun de Susanne 
   S. kummts zu äm beinah Gleichschtand vun 9:8! De Christian un de Dennis 
   wollen 's Zepter net aus de Hand gewwe un leschen widder än Gang zu. Se 
   lossen die Susanne un die Sandra laafe - schicken se vun vorn reschts am 
   Netz nach hinne in die link Eck. Un alldieweil alle beide ihne den Gfalle 
   dun, immer gleischzeitisch zum Balle zu renne, anstatt sisch die Ärwet zu 
   dääle, gehn de Dennis un de Christian schnell widder mit 14:8 in Fierung un 
   hänn ihrn erschte Metschball. Awwer de Dennis schpielt en sehr leischte Balle 
   knapp ins Aus (Om. vum Redaktör: Niete!!! :-) ) un 's Uffschlaachrescht 
   wekselt widder. Die Susanne un die Sandra schpiele jetzert konzentrierter 
   un de Dennis trauert soine vergewwene Schoons hinnenoch. De Dennis schpielt 
   die Bäll oft ins Aus, trifft die Bäll net rischtisch oder setzt än Schlaach 
   zu hoch o, dass die Sandra R. gemiedlich än Smesch noch em anner osetze kann, 
   denn dann de Christian R. net erreiche dut. Un uff emol is alles widder offe: 
   14:14 - die Verlängerung (bis 16) muss entscheide. De Dennis G. un de 
   Christian R. sinn völlisch vun de Roll un machen sich gescheseitisch Vorwierf 
   (Om. vum Redaktör: Des konn isch mer rischtisch bildlisch vorschtelle!) fer 
   vergewwene Meeschlischkeite. Un schunn hänn die Susanne S. un die Sandra R. 
   de 1. Metschball: 14:15. Awwer de Christian R. un de Dennis G. raufen sich 
   nochemol zusamme un kennen - wenn ach miehsam - de erschte, zwätte, dritte 
   un de vierte Metschball mit Glick abwehre. Awwer de finfte Metschball sitzt. 
   Dursch än Reddungsschlaach vun de Susanne S. uff än Smesch vum Dennis G. hie, 
   kummt de Balle uuvorhersehbar zum Christian R., der trifft'n nimmie 
   rischtisch - un die Mädels juweliern!!! Än zum Schluss verdiente un 
   erkämpfte 14:16 Siech iwwer die vermeindliche Favoridde. Abklatsche bei de 
   Siescherinne un allgemeines Schäik-Händs fer e färes un dolles Schpiel ... 
18.03 Uhr: Die Schtimmung is nach dene dolle Gäims rischtisch gut, alldieweil 
   jeder soi Beschtes gewwe hot. Mer verlosst zusamme die Olaach - in Schwäß 
   gebade - un mer is sisch änre Sach sischer : 

   DES WAR NET DE LETSCHTE GEMEINSAME WETTSCHTREIT!!!!! 

   Hopp, alla bis dann .... 

-------------------------------------------------------------------------------- 

Zum Schluss gebts noch des Wort vun de Woch fer Insaider: < KÄNDELAITDINNA > 

Des wars awwer jetzert. 
Bis dann un denken dro, immer kräfdisch Pälzisch babble. 

                                        Eier Walz vun de Palz 
                                        un soi Tiem 
 

ZURÜCK ZUR ARCHIV-ÜBERSICHT