________________________________________________________________________________ 
________________________________________________________________________________ 

:::::::::::::::::::::::::::::::::::::::::::::::::::::::::::::::::::::::::::::::: 

                         < < < < < A C H T U N G > > > > > 

                     !!!! Die E-Poscht is nur fer Pälzer !!!! 

           Hesse, Badenser, Schwobe und Saarlänner misse drauße bleiwe 

:::::::::::::::::::::::::::::::::::::::::::::::::::::::::::::::::::::::::::::::: 
________________________________________________________________________________ 
________________________________________________________________________________ 

                                 Ausgabe 3/2000 

Rausgewer: RdPS (Retter der Pälzer Sproch) 
Chefschreiwer: Walz vun de Palz 
Schreiwer: Gretsche, Hotzeplotz, Nervesääsch, Krottegiekser, Brodworschdschorsch 

-------------------------------------------------------------------------------- 

                        Unser Motto vun dere Woch hääst: 

            <<<< Pälzer isses hekschte was en Mensch wärre kann >>>> 

-------------------------------------------------------------------------------- 

Desmol gibts e ziemlisch langi Ausgaab vun de Palz-Poscht, alldieweil mer eich 
mol e paar Sache erkläre misse, trotz Feierlichkeide am Wocheend. 
Un do wär noch ebbes, was mer los wärre wollen: 
Sorrrriiiii!!!! Mer sin druff uffmerksam gmacht worre, dasses bei de Schwobe 
"sodele" un net wie vun uns in de letschte Ausgaab fälschlisch behauptet 
"soderle" hääst. 
Awwer mer sin halt kä Schwobe, also nix fer uugut. 

-------------------------------------------------------------------------------- 

                         -Pälzer Sprochpriefung- 

In de letschte Palz-Poscht hämmer jo ä paar Kracher drin g'hatte. Sischer hänner 
net alles gewisst, awwer des macht nix. Was net is, des kann jo noch wärre. 
Awwer jetzt die Lesunge: 

-Isch denk ehr wissen all, was Fissemadente sinn. Fer alle Uugebildete, 's sinn 
 naderlich Ausflicht. 
-Un wann isch e Kipp rääche du, dann hääst des blotze. 
-Än Ziehamrieme is ganz efach e Quetschkomood, uff doitsch also e Ziehharmonika. 
-Un bexle dut mer, wenn mer schtinke dut 

Bei unserm Insaider sinn alle drei Lesunge rischtisch. Fer all die, die wu des 
jetzt net verstehn, macht des nix. Die Insaider wärn awwer hoffentlisch wisse, 
was gemäänt is (gell, Schd...?). 

-------------------------------------------------------------------------------- 

Die Woch also widder e paar leischtere Sache: 

diesisch: ( ) berauscht                         Schlabbe: ( ) Hutkrempe 
          ( ) windig                                      ( ) Hausschuh 
          ( ) trüb                                        ( ) Quaste 

Knerzel:  ( ) Hintern                           Rouches:  ( ) böser Zorn 
          ( ) Bauchnabel                                  ( ) besonderer Wunsch 
          ( ) Brotanschnitt                               ( ) ein Heiliger 

-------------------------------------------------------------------------------- 

Noch ään Witz fer zwischedurch: 

"Ach Gott Heiner, her, hoschd du awer abgenumme!", määnt de Schorsch. 
"Wie hoschd dann des gschafft?" - De Heiner lacht sich halwer schepp. 
"Wääschd, ich hab die Essisch-Kur durchgezoche. Eß isch was oder eß isch 
nix!" 

-------------------------------------------------------------------------------- 

Alldieweil die Palz-Poscht jo iwwer E-Poscht verschickt wärd, hänn mer 
beschlosse, eich emol e paar Zeiche zu erkläre, die mer bei unsre 
tächliche Korrespondenz ab un zu verwende dun. Alldieweil die Lischt vun 
denne ganze Zeiche ziemlich lang is, is des jetzert erscht emol e kläänie 
Auswahl. Wann mer dann e E-Poscht-Adress fer die Palz-Poscht hänn, kinnen 
er uns jo dann Fehler in dere Lischt mitteile (wann´s soweit is, dann dun 
mer eich schunn schää Bscheid gewwe), awwer 's gibt halt manche Zeiche, 
fer die wu jeder e annrie Bedeutung kennt, desdeweche is des do unser 
Bedeutung, die mer unner denne ähnzelne Zeiche verstehn. 

Alla hopp, dann lesens emol durch un machen eich eier Gedanke: 

 :-)    Des Zeiche hääst, dass die Bemerkung net ganz ernscht gemäänt is, 
        sozusache e bräädes Grinse. Ach kann des Zeiche bedeude, dass de 
        Schreiwer grad gut gelaunt is. 

 :-(    Des isses Gechedääl zu dem owwere Zeiche, des hääst also, dass de 
        Schreiwer net so arch gut uffgelecht is. 

 :-|    Des Zeiche saacht aus, dass de Schreiwer grad durchschnittlich 
        gelaunt is, also net positiv unn net negativ. 

 ;-)    Des Zeiche dut mer oft fer sarkastische Bemerkunge benutze, 's 
        hääst soviel wie "du mich net schlache fer des, was ich grad gschriwwe 
        hab!" 

 :->    Des Zeiche widderumm hääst, dass de Schreiwer grad e ganz arch 
        beesie Bemerkung gemacht hott un sich ach noch dodriwwer fräe dut. 

 ;->    Des Zeiche is e Kombination aus :-> un em Aachezwinkre, alles 
        klar? 

-------------------------------------------------------------------------------- 
So, des waren jetzert die Standartzeiche, jetzert awwer e paar "spezielle 
Zeichen": 

 (-:    De Schreiwer vun dere Nochricht is ähn Linkshänder. 

 %-)    Wann er des Zeiche in de Palz-Poscht säänen, dann hääst des, dass 
        mer schunn ganz arch lang vor de Combjuterkischt sitze dun un uns es 
        Hern ausdriggen um irchendwelche neie Nochrichte zu schreiwe. 

 :*)    Des Zeiche wern er wohl kaum in de Palz-Poscht sääne, ´s hääst 
        nämlich: de Schreiwer is im Vollrausch (dann sinn mer jo gar nimmie in 
        de Lach zu schreiwe). 

 [:]    Alldieweil mer, die Schreiwer vun de Palz-Poscht, kää Roboder sinn 
        sondern Mensche aus Flääsch un Blut un VOR ALLEM aus de Palz, wern er 
        des Zeiche net in de Palz-Poscht finne, gell! 

 8-)    Des widderum hääst, mer deden e Sunnebrill odder e Brill im 
        Allgemeine trache. Stimmt awwer sicherlich net, alldieweil mer, die 
        Palz-Poscht-Schreiwer, net so kuul sinn wie de Cool-Man aus de Werwung 
        un deshalb kää Sunnebrill nedich hänn. Geche e normali Brill is 
        naderlich nix oizuwende, denn wann mer nix mer säänen, dann kinnen mer 
        ach kää Palz-Poscht mehr schreiwe. 

 :'-(   Ach des Zeiche wern er wohl kaum in de Palz-Poscht finne, 
        alldieweil mer vun de Palz-Poscht immer gut druff sinn un deshalb net 
        heile dun. 

 :'-)   Des Zeiche hääst zwar ach heile, awwer desmol vor lauder Glick 
        (z.B. das die Palz-Poscht so gut ookummt). 

 :-@    Des trifft uff uns Palz-Poscht-Schreiwer zu, 's hääst nämlich: Mer 
        sinn zum kreische komisch, odder net? 

 =:-)   Des trifft naderlich net uff uns zu, alldieweil mer kää Hohlkepp 
        sinn. 

 :-Q    Ach des trifft net uff uns zu, alldieweil mer net blotze dun. 

 O :-)  Heiliche sinn mer zwar net, awwer des kann sich vielleicht noch ännre. 
  

So, des war jetzert erscht emol e korzie Lischt mit solche klääne Zeiche. 
Weitere Zeiche wern in Zukunft folche. Des wars ach schunn widder, awwer ehr 
hehrn widder vun uns. 
-------------------------------------------------------------------------------- 

Also, uff die Palz, Gott erhalt's! 

                                 Eier Walz vun de Palz. 

ZURÜCK ZUR ARCHIV-ÜBERSICHT