SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 28/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...
Rausgewwer: RdPS (Retter der Pälzer Sprooch)
Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz

Unser Motto vun dere Woch hääßt:
<<< Liewer frieh als nie! >>>

So, die Woch widder nei: die Palz-Poscht! Mer sinn zwar heit e bissl frieher als sunscht, awwer isch denk, ehr wärrens iwwerlewe!
- Die Expo -
Kinners, letscht Woch wollt de Schtummel eisch noch vum Kroadische Pawwilljong verzeele un jetzert versetzt er mich un losst misch im Resche schtehe!! Dud mer jo werklisch Lääd, awwer dann missen ehr halt heid emmol mit mir Vorlieb nämme.Awwer ich hab jo ach noch so einisches erlebt uff dere Expo - wär jo gelacht, wenn isch des jetzert net allää schaffe det:

Isch hab mer iwwerlescht, dass isch eisch heit mol e bissl was iwwer die Asiate uff de Expo verzehl. Die sinn naderlisch - wie kann's ach annerscht soi - mol widder iwwerall uffgfalle. Des hot schunn am Oigang ogfange, als mer do in de Schlang gschtanne warn un plötzlisch is vun hinne en Schwung Japaner kumme. Uhne se zu sehe, hoschte schunn gemerkt, wenn se am End vun de Warteschlang okumme sinn. Dann is nemlisch mol vun hinne schun leischter Druck uff die Vordere ausgeiebt worre un mer hot sisch eher wie in de New Yorker U-Bahn gfiehlt... Un dann noch des Gschnattere - isch hab grad gemäänt, de Bauernverband wär mit hunnert Gäns ogerückt. Awwer was soll's, irschendwann war mer jo dann drin (in de EXPO) und do hot sisch die Sach ziemlisch schnell verloffe. Ach des Rudelverhalte vun de Japaner war nur noch korze Zeit zu beowachte - dann sinn se in klääne Grüppscher in alle Himmelsrischtung devu gerennt. An dem Daach hot mer se dann awwer ach nur noch gsehe, wenn se mol widder so e beriehmte Photo-Seschn abghalte hänn - dann is nämlisch an Engpäss de ganze Verkehr uffghalte worre.

Awwer genuuch vun de Japaner, geh mer mol zu de Chinese: Die Volksrepublik hot nemlisch ach ehrn eischene Pawwiljong uff de EXPO g'hatt. Awwer ehrlisch gsaacht, irschendwie sinn die net mit beide Bää uff'm Bodde der Tatsache gebliwwe. Des, was isch eisch jetzert verzehl, is net geloche: Mer kummen do so in de Pawwiljong noi un plötzlisch sinn mer uff'm Mond. Do schteht direkt vor uns des Mondgefährt, mit dem die Amis 1972 do owwe rumgegurkt sinn - norre mit dem Unnerschied, dass uff dem Auto net die amerikanisch Flagg is, sondern de chinesisch (?!?). Awwer 's werd noch doller: Dann laaft uff em klääne Bildschirm e Dokumentation iwwer de erschte Mensch uff'm Mond - un des soll vun emol en Chines gewesst soi. Es folgt e Darstellung vun de verschiedenschte Rakete un Space Shuttles (??!!??) aus chinesischer Produktion. Komisch do dro war norre, dass des alles genau wie bei de Amis ausgseh hot - nur dass iwwerall die chinesisch Fahn druff gemolt war. Dann hänn se die Sach sogar noch weiter getriwwe un hänn gezeischt, wie de erschte Mensch - naderlisch än tapfere, klääne Chines - soin Fuß uff de Mars gsetzt hot. Isch saach's eisch, wie isch endlisch aus dem Pawwlijong drauße war, hab isch misch erscht mol gfroocht, ob vielleischt net bei dene do driwwe, sondern bei uns die Gschichtsbücher gfälscht wärrn. Erscht schpäter hab isch dann erfahre, dass des alles norre Fiktion war, wie's hätt soi kinne, wenn des Wörtsche "wenn" net wär...

Also ganz ehrlisch: An dem Daach hab isch genuuch vun Asie gsehe un desdewesche du isch jetzert mit moine Verzehlung uffhehre. Nekscht Woch geht's weiter - dann garantiert widder mit'm Schtummel.
 

- Pälzer Sproochpriefung -
Wie ner's schunn immer gewähnt sinn, gebt's ach desmol widder zu allererscht die Ufflesunge vun letschtmol:
- Brausch is e pälzer Wort fer frisch un hot nix mit Brauch zu du.
- Wenn ähner eigschnappt is, dann isser verärgert odder ach beleidischt, awwer nix annres.
- Des war jo mol widder efach: Naderlisch is en Käänisch en König, was sunscht?
- Un kalfaktert werd, wenn mol widder Grüchte umgehn un verbeitet wärrn.

So, des war's mit de Lesunge vun letschtmol, jetzert gebt's widder vier neie escht-pälzer Wörter:
E klää bissl is die Abschdimmung nei gemacht worre. Falls des bei eich net rischtisch oogezeicht wärd, hermehle un uff den Link, der unne schteht, druffklicke!
  
 

alsnoch

stinken
immer noch
anwidern

Kappes

Pudelmütze
Verantwortung
Unsinn

trickle

trocknen
hintergehen
zuspritzen

finf grad soi losse

egal sein
genau nachzählen
feilschen

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"

Denken dro: 's gibt was zu gewinne am Enn vum Johr (was, des dun mer erscht schbeeder verrode...)

 
Do nun die aktuell Ranglisch aus unsre Sproochpriefung:
(Jedes rischtische Wort gibt 1 Punkt, die Orte sinn jetzert mitgerechnet)
Platz Name Punkte Teilnahmen
1 Stefan Weis 36 9 + Orte
2 Tanja Jacob 32 8 + Orte
3 Sebastian Zipp 20 5 + Orte
4 Alex Korz 7 2
5 Jörg Scherer 3 1
Wie aus dere Lischt zu entnemme is, hänn mer uns vor Teilnahme nimmie rette gekinnt ;-), desdeweche machen schää all mit, dann wärrd die Sach noch schbannender!

- Pälzer Grammatik -
Um Nicht-Pälzer net glei so zu schocke, hänn mer beschlosse, in unsre Rubrik "Pälzer Grammatik" zuerscht emol die efache un leischt verschtändlische Reschle in de Pälzer Sprooch zu erkläre. Unser Thema heit is:

IV) Namen

Heit gebt's norre en korze Exkurs in de Pälzer Grammatik, alldieweil nemlisch des, was isch eisch zu verzehle hab, nix weltbeweschendes is. Mir wollen mol betrachte, wie im Pälzische en Satz aussieht, in dem irschendää Person mit Name erwähnt werd. Zuerscht des Ganze uff Hochdeitsch:

Fritz mäht den Rasen.

Im Pälzische sieht des unner Owendung vun dene Reschle, die mer schunn gelernt hänn, in etwa so aus:

De Fritz dut de Rase mähe.

Dem uffmerksame Leser fallt jetzert naderlisch schunn gleisch uff, was do dro nei is: "Fritz" schteht nemlisch net wie im Hochdeitsche allää, sondern wärd mit'm Artikel gebraucht. Des is iwwerall in de Palz gängisch un eischentlisch kaum noch erwähnenswert, awwer Hochdeitsch-Babbler missen des jo irschendwann mol gsaacht krieche. Bei weiblische Name werd naderlisch ach de weiblische Artikel verwend - des is jo ganz klar. Beischpiel:

Die Anne geht mit ehrm Hund schpaziere.

Also, ehr sähnen: Ganz efach un net schwer zu lerne. Des war's ach schunn fer desmol, nekscht Woch geht's weiter.

  
- Pälzer Schimpfwerder - Dääl dreizeh-
 
So, ach fer die Woch hänn mer mol widder e paar "schääne" pälzer Werder ausg'sucht. Do sinn se:
 
Doftel Des is en Dummkopp, der iwwerhaupt nix im Kopp hot
Fetze E uuzuverlässischie un sogar manchmol arme Person
Großmogul So en Oogewwer hot's noch nie gewwe
Kamuffel En bleede Kerl
Schmeeßmick Des is en uuappetitliche un schmieriche Kerl
Vollsauf So bezeichent mer en Trinker, der die Kehl net voll genug kricht

- Witze -
So, do mol widder die Witze der Woche:
 
De Sohn zum Vadder: "Soll isch der vun moinre erschde Fahrt mit deim Audo verzehle odder willschd du des morsche in de Zeitung lese..."
 
Saacht de Hahn zu seinre Henne: "Wann du kää Ei leche kannschd, dann missen mer ghalt ähns adoptiere."
 
Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!

Do nun die Weisheit der Woche: << Kann dann zähle so schwer soi? >>
Am Beschde ehr froochen mol die Amis, die kinnen eich do beschdimmt weiderhelfe!
Des war's jetzert fer die Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem

 

ZURÜCK ZUR ARCHIV-ÜBERSICHT