SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 26/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...
Rausgewwer: RdPS (Retter der Pälzer Sprooch)
Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz

Unser Motto vun dere Woch hääßt:
<<< Unn weider geht's mit de nekschde 25 >>>

So, die Woch widder nei: die Palz-Poscht! Heit hänn mer ach noch was B'sonnres zu feiere: Unsern Mitschreiwer Hotzeplotz hot heit Gebortsdaach. Isch saach bloß ähns: O Schreck, o Schreck, die ÄHNS is weg (isch hoff, ehr wissen jetzert all, wie alt er is).
So, mer mechden des Ereichnis awwer net in de Vordergrund stelle un fangen desdeweche glei widder oo.

- Die Expo - Dääl 2 -
Ich hoff, er kinnen Eich noch ans Enn vum erschde Dääl erinnre. Und won net, donn kinner ach gern des gonze nochemmol nochleese uff unsre Hoompäädsch www.palz-poscht.de Unn wenner gonz genau in Eierm Hinnerschtübsche kramen, donn wissener beschtimmt ach noch, dass de Hotzeplotz mir - em allerberiehmdesschde Schreiwer vun se hoohl weid woärld - oogedrooht hot, daß er sich oimische det in moi Ausfiehrunge. Awwer des werr ich hoffentlich zu verhinnre wisse!!! Also: am nekschde Daach simmer also widder uff dem Riesegelände oogedanzt ...

Jetzert fang net schunn widder so wie letscht mol o - des kenne mer alles schunn. Loss misch jetzert mol verzehle, was mer so alles uff de EXPO passiert is, do sinn doi Schtorries nix degesche. Also, ach isch war uff...

Jetzert halt awwer die Gosch - moin liewer Scholli. Loscht du do änner vum Senkel. Ich will jetzert mit moine Verzehlunge vunn de Expo weidermache!

Also nochemmol: Mer hänn uns also widder uff die Expo gewaacht am Daach druff. S'war schunn werrie viel los unn schunn am Oigang - obwohl mer unser Kaade schun kadde hänn - hämmer e bissl waade misse, weil jo ach die Rucksäck durch so'n Skänner gemisst hänn, ob mer net vielleischt doch e Messer odder e Atombomb debeihot. Dodefu hämmer uns awwer net oischüchtre losse unn sinn - am Owend vorhär schunn geplant - schnurschtracks uff de fronzeesische Pawwiljong zumaschiert. Erwartet hot uns e ziemlich lange Schlang, awwe da mer vorher schunn die Schlang vun de "Veränichde Arabische Emiraade" gsehe hänn, war des kään Vergleich unn mer hänn die Herausforderung oogenumme. Doch wie schunn am Owend vornehär ware mer iwwerraschd, daß es widder recht flugs gonge is. Unn schunn noch ännere färdl Schdunn ware mer drinn ( *Ähh ... bin isch drinn odder was?* - frei noch'm Bobbele). Freundlisch begrießt mit emme "Bong Schuhr" (fer die Outsider: Bonjour) kam mer donn in än Gang, wu on de Wänd Bilder vun beriehmte fronzeesische Forscher un Teschniker. Froochen mich jetzert nimmie, wer des alles war, ich hab nämlisch kää Ohnung - awwer an die Gebrieder "Mongolfiääre" konn ich mich noch erinnre. Des waren die mit dem erschde Heißluftballong. Dodenoch gings durch so ä Art Schlund, wo an de Wänd verschiedene Videos geloffe sinn. Än Film hot mich do bsonners fasziniert. Do hot mer sehe gekinnt, wie die Welt vor zich Milljone unn Milljarde Johr ausgsehe hot, wie se heit aussieht und wie se - mit 99%ischer Sischerheit - in ä paar Milljönscher Johr aussehe dut. S'war schun interessont. Gradaus gings zu ännere Attraktion, die ich mer leider hab entgehe losse misse, alldieweil do viel zu viel los war. Allerhopp - weiter gings in än Raum, wo mer hot en - romantischer
awwer viel zu langweilische un nichtssaachende - Film ogucke gekinnt hot. Do hän a paar geknuutscht, ä par Leid gschafft und mer hot e bissl was vum Lond gsehe - awwer mehr ach net. De ledschde Raum in dem Pawwiljong war donn de Fluuchzeiche und der Ziech gewidmet. Vum TGW bis hin zum ICE und von de Jessnar bis hin zum neie Ährbuss von "Ähr Frongs". Es gebt schunn die dollschte Gerääde ! Ja unn schwupps ware mer widder drause. Gschdressd awwer positif iwwerraschd.

Noch ennere klenne Snäckpaus hämmer uns donn uff de Weech gemacht zu unserm nekschde Ziel: Kroatien! Kää hunnert Meeder Luftlinnie vun Fronkreisch weg. Schun allä des Gebäude hot mich arschitektonisch wie gschdalterisch oogschbroche
..

Jetzert langt's awwer. 'S wärd Zeit, dass isch do mol oigreif, sunscht babbelt der jo ewisch weiter. Isch hab nemlisch ach noch was zu verzehle: Wie gsaacht, ach isch war uff de EXPO in Hannover. Leider war isch dort awwer net allää, alldieweil 150000 annre Leits genau die gleich Idee g'hatt hänn - so e Pech. Des hot dann dodezu gfiehrt, dass isch mer bei viele Pawwiljongs die Bää in de Bauch gschtanne hab, bevor isch iwwerhaupt drin war. Am schlimmschte war die Waarterei awwer am Saiklboul (uff englisch: Cyclebowl), des war die Ausschtellung vum "Griene Punkt". Jetzert froochen ehr eisch naderlisch: Was is am "Griene Punkt" so interessant? Isch saach eisch, des hab isch misch aa gfroocht, wie isch zwääehalb Schtunn vornedro gewaart hab un es is fascht iwwerhaupt net voraa gange. Des äänzigschte, was misch in dere Schlang noch g'halte hot, war e Verschpreche vun em Freund, der gsaacht hot, dass isch's net bereue det, do noi zu gehe. Also hawwisch gewaart... Un irschendwann war isch dann drin. Am Oigang hab isch dann ach erfahre, was do so interessant soi soll: Jedi Schtunn dut sisch nemlisch in dem Gebäude en Tornado ausdoowe - do war isch also mol gschpannt. Zuerscht is mer uff ännre schpiralförmische Rampe langsam nach owwe gange - immer schää im Kreis. Emol war mer dann im tiefschte brassilianische Urwald, e annres Mol hot mer sisch die verschiedenschte Abfallprodukte vun unsre heitische Gsellschaft ogucke kinne - un was de "Griene
Punkt" dann draus macht. Isch muss jo saache, manche Sache warn ganz interessant, awwer die zwääehalb Schtunn Waarte warn noch net gereschtfertischt. Awwer dann is die Hauptsach kumme: Ehr missen wisse, dass des Gebäude rund gebaut war un dass der ganze Inneraum nur ään änzigschte Raum mit 22 Meter Höh war. Owwe in de Deck warn riesische Ventilatore un ganz unne en klääne See. Die Ventilatore sinn dann langsam oogeloffe un hänn ehr ganzi Wirkung gezeischt. Ganz langsam hot sisch des Wasser aus dem See g'hoowe un es hot sisch en schmale Trichter gebild, der immer weiter gesche die Deck gange is. Fer en korze Moment hot dann der Wassertrichter bis an die Deck gereicht - in 22 Meter Höh! Do war isch schunn schwer beoidruckt. Schließlich muss mer sisch jo mol iwwerlesche, was fer e Kraft do notwennisch is, um des Wasser bis an die Deck zu krieche. Hinnenoch muss isch also schunn zugewwe, dass sisch die zwääehalb Schtunn Waarte gelohnt hänn - mer sieht jo net jeden Daach en Tornado. So, des war's, was isch zu verzehle g'hatt hab. Also bis nekschtmol, eier
Hotzeplotz.

Kinners. jetzt hot der Worschdlsepp mir moi gonzes Konzept durchenanner gebroocht. Aller gut, donn geb ich halt zum Schluß ach nochmol moin Senf dezu. Jetzt, wo de Hotzplotz misch do iwwerrumblt hot bin ich halt nimmie zu Kroazie kumme. Des dut mer Lääd, awwe ich verschbrach Eich, daß ich näkscht Woch dodezu
mehr verzeehle du!! Machens gut un mer sieht sich!

- Pälzer Sproochpriefung -
Wie ner's schunn immer gewähnt sinn, gebt's ach desmol widder zu allererscht die Ufflesunge vun letschtmol:
- Wenn ebbes verkrumpelt is, dann isses zerknittert, des wääß doch jeder.
- Un Loschie hääßt nix anres als Unnerkunft.
- Bei fixiere hänn die määschte vun eisch uff feschtmache getippt un des is jo ach rischtisch. Awwer urschpringlisch is fixiere 's Pälzer Wort fer irschendwas oschtelle. Awwer weil mer jo net so sinn, gebt's uff beides en Punkt.
- Un 'n Katzuff is en Metzger. Froochen mol die Oma odder de Opa, vielleischt wissen die des.

So, des war's mit de Lesunge vun letschtmol, jetzert gebt's widder vier neie escht-pälzer Wörter:
 

feggere

schnell laufen
lautstark beschweren
kehren

alla Boneer

versch. Beeren
alle Achtung
viel Glück

keifle

rauchen
drängeln
kauen

rahn

sauer
zuvorkommend
schlank

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"

Denken dro: 's gibt was zu gewinne am Enn vum Johr (was, des dun mer erscht schbeeder verrode...)

 

Do nun die aktuell Ranglisch aus unsre Sproochpriefung:

(Jedes rischtische Wort gibt 1 Punkt, die Orte sinn jetzert mitgerechnet)
 
Platz Name Punkte Teilnahmen
1 Stefan Weis 35 8 + Orte
2 Tanja Jacob 29 6 + Orte
3 Sebastian Zipp 16 3 + Orte
4 Alex Korz 7 2
5 Jörg Scherer 3 1
Wie aus dere Lischt zu entnemme is, hänn mer uns vor Teilnahme nimmie rette gekinnt ;-), desdeweche machen schää all mit, dann wärrd die Sach noch schbannender!

- Pälzer Grammatik -
Um Nicht-Pälzer net glei so zu schocke, hänn mer beschlosse, in unsre Rubrik "Pälzer Grammatik" zuerscht emol die efache un leischt verschtändlische Reschle in de Pälzer Sprooch zu erkläre. Unser Thema heit is:

II) Pälzer Relativpronomen

Wenn ehr jetzert schunn e bissl länger aus de Schul raus sinn und wissen desdewesche nimmie, was e Relativpronome is, dann is des kä Problem. Do nochemol e (hoch)deitsches Beischpiel fer all die, die wu's widder lerne missen:

"Das Buch, das ich kenne." (Beschwern eisch jetzert net iwwer des Beischpiel - des schteht so im Duden)
 
In dem Satz is des zwätte "das", also des hinner'm Komma, e Ralativpronome. Des bezieht sisch uff des Hauptwort, des vorne dro schteht (bei unserm Beischpiel also 's "Buch"). So, jetzert wissen ehr's widder, odder? Un ehr wissen beschtimmt ach, das des Relativpronome vum jeweilische Gschlecht vun zugehehrische Hauptwort abhängt (also "der", "die" odder "das"). Do setzt jetzert de Pälzer oi: De Pälzer sacht nemlisch, dass des doch viel zu komplieziert is un dass des ach efacher gehe misst. Un 's geht ach efacher:De Pälzer losst die gschlechtlische Unnerscheidung weg un saacht statt "der", "die" odder "das" efach "wu". Des klappt immer. Damit sisch des die Nicht-Pälzer unner eisch ach vorschtelle kinnen, jetzert e kläänes Beischpiel (nemme mer doch grad widder des vun do owwe):

Des Buch, wu isch kenn. odder
De Bääm, wu schepp is. odder
Die Kischt, wu do schteht.

Awwer eschte Pälzer gewwen sisch dodemit noch net zufriede. 'S werd nemlisch nochträglisch nochemol uunedisch kompliziert gemacht, indem mer de gschlechtsschpezifische Artikel doch noch in den Satz oifiescht. Des sieht dann so aus:

Des Buch, des wu isch kenn.
De Bääm, der wu schepp is.
Die Kischt, die wu do schteht.

Des war eigentlisch schunn alles, was mer dodriwwer wisse muss. Fer alle Nicht-Pälzer: Machen dodezu mol e paar Iewunge un ehr wärrn sähne, dass 's gar net so schwer is. Wenn ehr des beachten, sinn ehr schunn halwe Pälzer. Un alles, was ehr sunscht noch wisse missen, erfahren ehr in de nekschte paar Ausgawe vun de Palz-Poscht. Also bis dann.

- Witze -
So, do mol widder die Witze der Woche:
 
Saacht die ähnd Fraa zu de annre ganz schtolz: " Her, moin Mann is bei de Polizei." - Saacht die anner Fraa: "Moiner ach, denn hänn se geschdern abg'holt."
 
Zwää Polizeibeamte fahren mit'm Auto geche ähn Baam. Dodruffhie saacht de ähnde Polizischt: "So schnell waren mer noch nie am Unfallort."
 
Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!

Do nun die Weisheit der Woche: << Wann ähner zwanzisch is, dann geht der uff die dreisisch zu >>
Falls do ähner was degeche hot, ähfach mehle...
Des war's jetzert fer die Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem
  

 

ZURÜCK ZUR ARCHIV-ÜBERSICHT