SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 25/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...
Rausgewwer: RdPS (Retter der Pälzer Sprooch)
Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz

Unser Motto vun dere Woch hääßt:
<<< So, die 25 is g'schafft >>>

So, die Woch widder nei: die Palz-Poscht! Die Woch hänn mer e kläänes Jubiläum, lossen uns dodevu awwer net beoidrugge un fanen ach glei widder mit de Hauptsaach oo.

- Aktuelles iwwer die Walz vun de Palz -
Moi Zeit bei de Bundeswehr!
Ja, ehr hänn rischtisch gelese: Isch bin bei de Bundeswehr, ob ehr's glaawen odder net... Desdeweche hab isch mich entschlosse, eich iwwer die erschde zwää Monate vun meine insgesamt zehmonatiche Truppezugehörichkeit zu berichte. Heit, wie verschproche, de letschde Dääl:
BiWaK
So, fer all die, wu des noch net kennen, do die ausgschriwwe Version: Bundeswehr im Wald außer Kontrolle (odder so ähnlisch).
Jetzert froochen ehr eich: Was wärd do gemacht? Ganz ähfach: Des is nix annres als e Zeltlaacher, in dem mer die Sache, die wu mer mehr odder wennicher gut gelernt hänn, oowenne sellen. Des hääßt: Zelte uffbaue, Iewunge mache, iwwerprieft wärre, abbaue, häämfahre. Im Große un Ganze is de de Abschluss vun de Grundausbildung, alldieweil dodenoch die Iewunge nimmie fortg'setzt  wärrn, un em bloß noch so e dabbichie Wachausbildung bevorsteht. Des Ganze soll en klääne Oisatz darstelle, der awwer eichentlich recht ruhig verlaaft, also bloß kää Hektik uffkumme losse.
So, des war's jetzert mit dere Reih, isch hoff, ehr sinn e bissl schlauer wore un verschdehen die Bundeswehr jetzerte e bissl besser!

Die Palz - Dääl zeh
 Im Zuuche vun unsre neie Rubrik "Pälzer Grammatik" wolle mer eisch heit nochemol 's Pälzer Alfabet präsentiere. Die Treuschte unner eisch wissen, dass des schunn emol in der allererschte Palz-Poscht zu finne war, un alldieweil des jo jetzert schunn e halwi Ewischkeit her is un mer in de Zwischezeit viel neie Leser kriecht hänn, hänn mer gedacht, dass 's widder emol Zeit defier is. Also, do is 's offizielle Pälzer Alfabet:
 
A : Abbelpannekuche B : Brodworschd C : Cyriakuspädler
D : Dummbabbler E : Elwetritsche F : Fasaneschreck 
G : Grumbeere  H : Horwel   I : iwwerzwersch
J : Joggel K : Keschtebääm L : lebsch
M : Maade N : norre O : Owacht
P : Persching Q : Quasselschtrip R : Ranze
S : Saufzisch Sch: Schlabbe T : Treppler
U : Uuzname V : Versehrdesport W : Woirewe
X : Xangbuch Y: Ywwerkandiddelde Z : Zorniggl

- Die Expo -
Wie ehr wahrschoins all mitkriecht hänn, geht die EXPO 2000 in Hannover die Woch zu End. Des is fer uns en Grund, en klääne Rickblick zu gewwe un iwwer e paar Sache zu berischte, die mer uff de EXPO erlebt bzw. g'sähne hänn. Als erschtes gebt's heit mol e Ausfiehrung vun unserm Schtummel:
"Se Wöarld Äkspoosischn Tusausnd"
   (The World Exposition 2000)
Also gut, dann will isch mol ofange, eisch ebbes iwwer moin Ausfluuch zu de EXPO zu verzehle:
Ogfange hot alles demit, dass isch zu moim Gebortsdaach e Kaart fer die EXPO gschenkt kriecht hab. Un alldieweil isch jo net allää iwwer des Riesegelände schlappe wollt, hab isch mer efach moi Freunde gschnappt un mer hänn uns zu viert uff de Wesch nach Hannover gemacht. Nach vierehalb Schtunn Fahrt mit'm Auto hämmer dann endlisch 's Rieserad sehe kinne (Om. vum Redaktör: Des hättscht im Moment ach grad in Lautre hawwe kinne, un des is net ganz so weit wie Hannover).
Alldieweilmer uns jo glei gedenkt hänn, dass mer an ääm Daach mit hunnertprozentischer Sischerheit net alles sähne kann, hämmer mit em Owendticket noch e paar Pawilljongs (fer all, die des jetzert net kapieren, uff deitsch: Pavillons) bei Nacht erkundet...
Irschendwu hämmer jo ofange misse, un so sinn mer zum klääne Palascht vum Jemen kumme. Die erscht Iwweraschung: Mer hänn NET oschtehe misse (Om. vum Redaktör: Du Glicklischer!). Vor dem Oschtehe hänn mer de meischte Horror g'hatt, alldieweil mer jo vorher schunn viel iwwer die lange Wartezeite g'hehrt hänn. Dodezu isses dann awwer erscht am näkschte Daach kumme. Uff jeden Fall isses im Jemen erscht emol an Tee, Wasserpfeife un sog. "Tschill-Aut-Ruums" uff orientalischi Art vorbei gange. Un naderlisch hot en Basar ach net fehle dirfe. Die dolle Sache uff dem Basar warn awwer - was ää Wunner - viel zu deier. Awwer schunn allää des Haisl un die freundlische Orientaler warn die "Rääs" wert...
Als nekschtes hämmer de Finnland-Pawilljong in Ogriff genumme. Do warn mer dann zwar in de Schlang gschtanne, awwer zum Glick isses zügisch vorwärts gange. Außerdem war's noch ganz lustisch, 's offizielle Oihole vun de finsch Fahn dursch so volkstiemlische Vertreter vun dem Land zu beowachte - des ganze naderlisch mit Fanfahre un allem meschlische Schnickschnack. Un dann sinn mer mit Händedruck (jeder änzelne Besucher) im Pawilljong begrießt worre. So än Gang dursch lauder Kinnerbilder un (teilweise uusinnische) Kombjudaprojektione (un äm dolle Kombjudagäg: Mer hot uff so ännre Leinwand mit'm Sensor e Rentier herwinke kinne un des dann mit wildem Gefuchtel widder verjaache kinne) fiehrt dann zu de nekschte Ebene, wu's um Teschnik gange is. Än als Mensch verkleidete Monschterkombjuda (odder war's e Maschin?) hot Zischelschtää in de Gschend rumg'hoowe un an ännre Wand hot mer dursch uuzählische Gucklöscher uuwischtische Sache sähne kinne, vun dene känner gewißt hot, fer was se eigentlisch gut soi sollen. Awwer egal, am End vun dem Gang hot mer sisch dann noch in die Besucherlischt oitraache kinne, alldieweil die Finne mit de meischte Unnerschrifte ins Guiness-Buch kumme wolln (Om. vum Redaktör: Bei dene Besucherzahle vun de EXPO hänn se des garntiert net gschafft...). De letschte Abschnitt war dann so en Ruheraum, wu mer Tiere aus Finnland bewunnre gekinnt hot (awwer leider ach widder norre Kombjudaanimatione). Intressant war do dro, dass sisch de Bodde in dem Raum ogfiehlt hot, als wär's Rase.
Denoch hämmer dann noch e paar annre, net ganz so dolle Pawilljongs (wie zum Beischpiel die supa-dolle Schweiz (Ironie lässt grüße), die mer einische Rätsel uffgewe hot) besucht, hänn uns awwer dann dezu entschlosse, de Rescht am nekschte Daach in Ogriff zu nemme.
Awwer wie vun Zauberhand werd aus dem Schprung vun ääm Daach en Schprung vun ännre ganze Woch - alldieweil die Fortsetzung "Moin Ausfluuch zu de EXPO" erscht in de nekschte Palz-Poscht kummt (Om. vum Redaktör Hotzeplotz: Do misst isch dann ach noch moin Senf dezu gewwe, alldieweil isch nemlisch ach uff de "Wöarld Äkspoosischn Tusausnd" war...).

- Pälzer Sproochpriefung -
Wie ner's schunn immer gewähnt sinn, gebt's ach desmol widder zu allererscht die Ufflesunge vun letschtmol:
- Hinngverschisch hääßt ganz efach verkehrt rum. Der Ausdruck fallt efters im Zusammehang mit verkehrt'rum ogezochene Klääder.
- Un e Kaft is en Oischnitt (odder e Kerb).
- Raddegaggel hääßt en schleschte Woi, der zumeischt sauer is.
- Un e Franzosesupp is tatsächlisch e Gemiesesupp, ob ehr's glaawen odder net

So, des war's mit de Lesunge vun letschtmol, jetzert gebt's widder vier neie escht-pälzer Wörter:
 
 

verkrumbelt

zerknittert
verbogen
zerschnitten

Loschie

Taugenichts
Unterkunft
alter Mädchenname

fixiere

etw. anstellen
festmachen
drogenabhängig

Katzuff

Betrunkener
Katzenfutter
Metzger

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"

Denken dro: 's gibt was zu gewinne am Enn vum Johr (was, des dun mer erscht schbeeder verrode...)

 

So nun die aktuell Ranglisch aus unsre Sproochpriefung:
(Jedes rischtische Wort gibt 1 Punkt, die Orte sinn jetzert mitgerechnet)
 

Platz Name Punkte Teilnahmen
1 Stefan Weis 31 7 + Orte
2 Tanja Jacob 25 5 + Orte
3 Sebastian Zipp 12 2 + Orte
4 Alex Korz 7 2
5 Jörg Scherer 3 1
Wie aus dere Lischt zu entnemme is, hänn mer uns vor Teilnahme nimmie rette gekinnt ;-), desdeweche machen schää all mit, dann wärrd die Sach noch schbannender!
So, do noch die Ufflesung vun unsere Orte:
1.) Rlzm: Rülzheim
2.) Wingerte: Weingarten
3.) Deisem: Deidesheim
4.) Bermesens: Pirmasens
5.) Goise: Geinsheim
6.) Häärxe: Härxheim
7.) Wallse: Waldsee
8.) Nerrekärch: Niederkirchen
9.) Maade: St. Martin
10.) Loscht: Lustadt

- Pälzer Grammatik -
Schunn in de letscht Ausgab hänn mer eich druff hiegewiese, dass mer e neii Rubrik oifiehre welln - un do is se jetzert:
Pälzer Grammatik
In unsre Pälzer Sprochpriefung hänn mer eich jo jetzert schunn vierezwanzisch Mol 4 escht-pälzer Wörter erklärt. Awwer, wie ehr eich denke kinnen, sin Wörter un ehr Bedeutung net alles bei ännre Sprooch. Es g'hehrt nemlisch genau so e kompletti Grammatik dezu, die Satzbau un annre wischtische Sache reschle dut. Als Omerkung sei uns noch gschtattet, dass sich unser Grammatik uff's Vorderpälzische bezieht un das die ganz Sach in de Hinnerpalz jo schunn widder ganz annerscht aussieht. Alldieweil mer awwer im Hinnerpälzische net so bewannert sinn, bleiwe mer in unsre Geschend.
Unser erschtes Thema is heit (des wärrn ehr noch aus'm Deitschunnerischt kenne):
I) Konjugation vun Verbe*
   *Na, do sinn ehr platt? Ach mer Pälzer kennen Fremdwörter - hänn mer ganz
    sorgfältisch aus'm Wörterbuch abgschriwwe...
 
 
hawwe (1)
gehe (2)
soi (3)
isch hab
isch geh
isch bin
du hoscht
du gehscht
du bisch
er/sie/es hot
er/sie/es geht
er/sie/es is
mer hänn
mer gehn
mer sinn
ehr hänn
ehr gehn
ehr sinn
sie hänn
sie gehn
sie sinn
 
    Wie ehr sehe kinnen, is des net grad efach fer en Net-Pälzer, die ganz Sach zu lerne, alldieweil 's kä verbindlische Reschle gibt. Awwer was ehr eich sozusaache als Fauschtreschl merke kinnen is, dass's in de Mehrzahl meischtens nur ää Form gebt, egal ob's jetzert "mer", "ehr" odder "sie" hääßt.
 
    Awwer Pälzer wärn jo kä Pälzer, wenn se sich 's Lewe net leischter mache deten. Irgendwann hot sisch en schlaue Pälzer mol gfroocht, warum mer sich iwwerhaupt immer die ganze Forme vun dem Verb merke muss. Er hot sisch dann gedenkt, dass es jo viel efacher wär, wenn mer des Verb in soine ursprünglische Form belosse det un anstatt dem Verb e annres konjugiert. Es hot sisch schließlisch rausgschtellt, dass des Verb "due" dodefier ganz gut geeischnet is. Allerdings funktioniert der Trick net immer: Bei dene Hauptverbe "hawwe" (Fall 1) un "soi" (Fall 3) hehrt sisch des net ganz so gut o un desdewesche muss mer zumindescht die zwää noch normal konjugiere.
    Awwer im Fall 2 sieht des dann so aus:
    isch du gehe
    du duscht gehe
    er/sie/es dut gehe
    mer dun gehe
    ehr dun gehe
    sie dun gehe
    Des klappt im Grunde ach bei alle annre Verbe. Er sähnen, de Pälzer versucht sisch 's Lewe so efach wie norre meschlisch zu mache.
    So, des war's fer desmol. Nekscht Ausgab gebt's Neies vun uns.

- Witze -
So, do mol widder die Witze der Woche:
De Richter zum Oogeklachte: "Schdimmt des, das Sie in ähnre Organisation sinn, deren ähnzigschdes Ziel de Umschdurz is?" - "Ja, des is rischtisch. Isch bin im Kechelclub."
De Heinz saacht zum Schaffner: "Wie lang halt dann der Zug?" - "Bei guter Pflege 30 Jahre."
Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!

Do nun die Weisheit der Woche: << Ei, ei, ei, käftisch sinn mer debei! >>
Uff gut pälzisch: Die nekschde Ausgawe sinn g'sichert!
Des war's jetzert fer die Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem

ZURÜCK ZUR ARCHIV-ÜBERSICHT