SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 24/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...
Rausgewwer: RdPS (Retter der Pälzer Sprooch)
Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz

Unser Motto vun dere Woch hääßt:
<<< Jetzert geht's los! >>>

So, die Woch widder nei: die Palz-Poscht! Mer, die Palz-Poscht-Redaktion, lossen uns vun neie Gerüchte un Analyse aus de Sportwelt net beoiflusse un sachen desdeweche bloß ähns: Salwe, en Halwe!

- Aktuelles iwwer die Walz vun de Palz -
Moi Zeit bei de Bundeswehr!
Ja, ehr hänn rischtisch gelese: Isch bin bei de Bundeswehr, ob ehr's glaawen odder net... Desdeweche hab isch mich entschlosse, eich iwwer die erschde zwää Monate vun meine insgesamt zehmonatiche Truppezugehörichkeit zu berichte. Heit, wie verschproche, widder paar schääne Iewunge:
Kartenlesen
De ähfache Soldat muss in de Laach soi, sich im Gelände zurechtzufinne. Desdeweche gebt's bei de Bundeswehr die Karte-/Kompassausbildung. Die Ausbildung an sich macht eichentlich viel Schbass, alldieweil die ziemlich ruhich is un mer sich debei net ooschtrenge muss. Mer bekummt en Kompass un e Kart in die Hand un verschiedene Verfahre gezeicht, wie mer de eichene Standort ermittle kann. Die Methode ähnzeln uffzuzehle wär zu langwierich. Dann wärd des geiebt bis zum umfalle, un so klänne Spielcher veroostalt (wer is de schnellschde un beschde im Oinorde vun de Kart...).
So, dodemit missten eichentlich die Bundeswehriewunge abgschlöosse soi, falls isch käänie vergesse hab. Wozu des ganze dient, des erfahren ehr in de nekschde Palz-Poscht, also lossen eich iwwerrasche!

Die Palz - Dääl neun
Un ach heit hänn mer widder vor, eisch geografisch e bissl zu bilde. Dodezu hänn mer sechs Pälzer Ortschafte rausgsucht, die die meischte vun eisch garantiert noch net kenne dun. Also, leschen eisch schää die Landkaart newedro, damit ehr wissen, was abgeht:
1.) Vinnje: Vinningen (ja, so hääßt des uff Deitsch) lisch e paar Kilometer siedlisch vun Bermesens, ziemlisch noh an de franzesisch Grenz.
2.) Trulwe: Des lischt glei newer Vinnje, ganz efach zu finne.
3.) Schderre: Stetten (des wärrn jetzert vielleischt einische vun eisch kenne) finde mer uff de Landkaart östlisch vun KiBo.
4.) Weschte: Jo, ehr hänn jo rescht, Weschte is e Himmelsrischtung - awwer 's is ach en Ort in de Vorderpalz: Genauer gsaacht lischt Westheim bei Schweschnem, un 's nekschte größere Kaff is Germersche.
5.) Wallwe: Wallhalben lischt im Vier-Schtädte-Eck vun Lautre, Bermesens, Zwääbricke un Hombursch - ziemlisch genau in de Mitt.
6.) Mittelborre: Un Mittelbrunn, ach widder ganz leischt zu erkläre, lischt e paar Kilometer nördlisch vun Wallwe.
Vielleischt is eisch jetzert bei dene sechs Pälzer Ortschafte was uffgfalle: Bei alle is de letschte Buchschtaawe vum (Pälzer) Ortsname ä "e". Des is awwer känn Zufall, sondern des kummt in de Palz oft vor. Die Erklärung dodefier is eigentlisch ganz äfach: Wie ehr als gute Pälzer jo beschtimmt wissen, dun Pälzer net gern Abschied nemme. Un wenn's dann doch emol so weit is, dann soll er so sanft wie meschlisch ausfalle. Un jetzert frooch isch eisch: Gibt's im ganze Alfabet en sanftere und klingendere Buchschtaawe als 's "e"? - Die Antwort is ganz leischt: Nee, gibt's net. Deswesche hänn die Pälzer an viele Ortsname e "e" drog'hängt, damit de Abschied vun dort net so schwer fallt.
So, des war's widder. Nekscht Woch gebt's Neies vun uns.

- Pälzer Sproochpriefung -
Wie ner's schunn immer gewähnt sinn, gebt's ach desmol widder zu allererscht die Ufflesunge vun letschtmol:
- En Kriecher is naderlisch an Traktor, des wääß jeder Bauer. Un zwar wäärn die Traktore in Rhodt hergschtellt, in unsre schääne Vorderpalz.
- Un en Kuche, der net ganz durschgebacke is, der is dann wettstäänisch.
- En Hunnertkrawwler is naderlisch en Tausendfießler. Im Grunde is der Pälzer Ausdruck jo sogar besser, alldieweil Hunnert bschtimmt näher an de Ozahl vun dem soine Bää lischt als Tausend.
- Vielläpscher is rischtisch schääne griene Feldsalat.

So, des war's mit de Lesunge vun letschtmol, jetzert gebt's widder vier neie escht-pälzer Wörter:
       

Hinnigverschich

gekochter Wirsing
verkehrt herum
trügerisch

Kaft

kurzer Rock
Einschnitt
Heuboden

Raddegaggel

kläffender Hund
schlechter Wein
Rattengift

Franzosesupp

Gemüsesuppe
Pulverdampf
Fleischbrühe

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"

Denken dro: 's gibt was zu gewinne am Enn vum Johr (was, des dun mer erscht schbeeder verrode...)

Do nun die aktuell Ranglisch aus unsre Sproochpriefung:
(Jedes rischtische Wort gibt 1 Punkt, die Orte kummen erscht im November dezu...)
 
 

Platz Name Punkte Teilnahmen
1 Stefan Weis 19 6
2 Tanja Jacob 16 5
3 Alex Korz 7 2
4 Jörg Scherer 3 1
Sebastian Zipp 3 1
Wie aus dere Lischt zu entnemme is, hänn mer uns vor Teilnahme nimmie rette gekinnt ;-), desdeweche machen schää all mit, dann wärrd die Sach noch schbannender!

- Die Eschtler  - Kultur un G'sellschaft-
Aus aktuelle Gründe dun mer die Berischte iwwer's Lewe vun de Eschtler fer  e Zeit lang oischtelle. Unser Dr. Dr. Prof. Klaus Konfuzius nimmt nemlisch im Moment an ännre wischtische Konferrenz vun de UNESCO Teil, wu's drum geht, ob die Eschtler jetzert tatsächlisch zum Weltkulturerbe erklärt wärrn. Mer halten eisch awwer naderlisch uff'm Laufende un gewwen 's sofort weiter, wenn e Entscheidung gfalle is.
Bis dann. En Gruß an alle Pälzer un besonders an alle Eschtler.

- Demnekscht nei: Pälzer Grammatik -
Un es gibt immer noch e paar Leit uff de Welt, die kä Pälzisch kinnen. Desdewesche hänn mer uns entschlosse, ach dene wenische Uugebildete endlisch weiter zu helfe. Mer wollen ab de nekschte Ausgaab uff die Tücke im Pälzer Sprochgebrauch hieweise un Schritt fer Schritt erkläre, was mer alles beachte muss, um rischtischer Pälzer zu wärre. Frääen eisch schnunn emol, 's kummen nemlisch beschtimmt ach Sache dro, iwwer die sisch eschte Pälzer bisher wenisch Gedanke gemacht hänn.
Also bis zur nekschte Palz-Poscht.

- Witze -
So, do mol widder die Witze der Woche:
De Hans saacht zum Fritz: "Her, isch geh des Johr mol FKK-Urlaub mache. Willschd du mitkumme?" - "Nä Hans, des lohnt sich jo net fer mich." - "Ei, warum dann?" - "Isch bin doch korzsichtich."
"Hilde, is doin Mann immer so still?" - "Näh, du sellschd den mol beim Esse heere..."
Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!

Do nun die Weisheit der Woche: << 's isch jetzert Herbscht >>
Wann mer jetzert in de Frieh aus'm Fenschder guggt, dann kann mer des werlisch saache!
Des war's jetzert fer die Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem

 

ZURÜCK ZUR ARCHIV-ÜBERSICHT