SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 23/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...
Rausgewwer: RdPS (Retter der Pälzer Sprooch)

Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz

Unser Motto vun dere Woch hääßt:
<<< Endlich isse do... >>>

So, die Woch widder nei (endlich): die Palz-Poscht! Alldieweil die Probleme vun de letschde Woch soweit geleest worre sinn (awwer nur provesorisch), gibt's die Woch widder die Palz-Poscht. Also dann: lossen uns oofange!

- Aktuelles iwwer die Walz vun de Palz -
Moi Zeit bei de Bundeswehr!
Ja, ehr hänn rischtisch gelese: Isch bin bei de Bundeswehr, ob ehr's glaawen odder net... Desdeweche hab isch mich entschlosse, eich iwwer die erschde zwää Monate vun meine insgesamt zehmonatiche Truppezugehörichkeit zu berichte. Heit, wie verschproche, widder paar schääne Iewunge:
Als erschdes: Sport
In de Grundausbildung war die Sportauswahl wirklich "riesegroß": Laafe, laafe un nochmol laafe. Entweder um die Kasern, durch de Wald odder um de Sportplatz rum. Ähnzigschdie Abwechslung war de PFT (Physical Fitness Test - ja, ach bei de Bundeswehr gebt's englische Begriffe), alldieweil mer do renne, springe, Liechestütz un Sit-Up's mache "darf" un die Sach werd ach noch bewertet, naja... Desdeweche mecht isch eich mol erkläre, wie en vorschriftsgemäße Bundeswehrliechestütz aussieht:
1.: Mit'm Ranze uff de Bodde leche
2.: Sich in de Liechestütz hochdrigge
3.: Wann mer owwe is, also so e Art "schiefe Ebene" darstellt, dann muss mer mit ähnre Hand (welchie is egal) sich an de Unnerarm vun dem Arm, mit dem mer sich noch abschditzt, drokloppe, des hääßt mer steht korz bloß ähhändich do.
4.: Die Hand jetzert widder uff de Bode stelle un sich "hieleche"
5.: Beide Händ uff'm Ricke z'sammeklatsche
6.: So lang alles widderhole, bisses nimmie geht odder die Zeit abgeloffe is!
Als zwättes: gefechtsmäßisches Verpfleche
Des is, wie isch find, de wichtigschde Dääl vun de Grundausbildung! So laaft des Ganze ab:
mer nimmt en ziemlisch grade Stock, der im Wald rummlichtun dut dort dro die Essekännelscher drohänge. Damit des net so scheppert, werd um jedes Essgschärr e Dreicktuch drumgebunne. Dann geht's an de Essensausgabeplatz un die Dinger wärrn vollgemacht, dennoch widder zurick un nix wie dro an die "lecker" Mahlzeit (e bissl Dreck hot noch kääm gschadt). Des Ganze verlaaft awwer unner Sicherung, des hääßt ähner laaft voraus mit de Knarre im Oschlach, dann die zwää mit'm Stock un zum Schluß widder ähner mit de Knarre, wobei die immer gugge missen, das de Feind sisch net nähert.
So, des war's ach widder fer die Woch, lossen eich mol iwwerasche, wasses in de nekschd Ausgaab gibt!

Die Palz - Dääl acht
Seit letscher Woch wärrn ehr jo wahrschoins die Landkaart vun de Palz ausgiebisch studiert hawwe, um rauszufinne, welche Ortsname mer vun eisch wisse wollen. Un beschtimmt sinn ehr dodebei ach iwwer viel Pälzer Orte gschtolpert, vun dene ehr selten was g'hehrt hänn. Genau aus dem Grund wollen mer ach die Woch unser Heimatkunde noch e bissl fortsetze, um eisch widder Wissenswertes iwwer die Palz beizubringe. Do jetzert e paar Pälzer Ortsname mit de deitsche "Iwwersetzung" un ännre korze Laachebeschreiwung. Wenn ehr Luscht hänn, leschen eisch grad die Landkaart denewe un dun eisch e bissl bilde:
1.) Albsm: Albisheim lischt in de Näh vun KiBo in Rischtung Grünstadt.
2.) Bennesse: Bennhausen finnen ehr am Donnersbersch, also ach in dere Geschend.
3.) Druuschge: Kapellen-Drusweiler lisch bei Bad Berschzawwre in de schääne Südpalz.
4.) Eschwiller: Thaleischweiler in de Hinnerpalz lischt schunn gfährlisch noh am Saarland, bei Zwääbricke.
5.) Herrschdl:  Hirschthal is ganz noh an de franzesisch Grenz: Ehr kummen dorsch, wenn ehr zum Beischpiel vun Lanndaa iwwer Anweiler un Wieslautre ins franzesische Bitsch fahrn.
6.) Minsche:  Sischerlisch is ach Minsche bei uns Pälzer ziemlisch uubekannt. Awwer schließlisch muss en Pälzer wisse, wu Minsche lischt, alldieweil jo Bayern, wie ehr jo all wissen, ach emol zu de Palz g'hehrt hot. Also jetzert fer alle: München lischt an de Isar im südlische Zentrum vun Bayern - awwer bassen uff, des is e gfährlischi Geschend!
Ach nekscht Woch kriechen ehr vun uns widder seks neie Pälzer Orte, die net ganz so bekannt sinn. Falls ach ehr en Ort kenne, vun dem ehr määnen, die reschtlisch Palz misst'n kenne, dann schreiwen an uns: redaktion@palz-poscht.de

 
Ach gibt's do noch de Link fer unser Abstimmung vun de letschde Palz-Poscht:
Wenn ehr jetzert mitmache wollen, ähfach uff den Link http://www.palz-poscht.de/aktuell/pp-22.html klicke, dort des Ganze ausfille un ab geht die Poscht. Alla, viel Glück!


- Pälzer Sproochpriefung -
Wie ner's schunn immer gewähnt sinn, gebt's ach desmol widder zu allererscht die Ufflesunge vun letschtmol:
- Gäälrieweschtampes sinn pürrierte Karotte ('s g'hehrn eigentlisch ach noch Grumbeere dezu) un 's schmeckt escht gut.
- Der Begriff Mallerschlössel is gar net so bekannt, awwer gemäänt is demit e Vorhängeschloss.
- Zu Rand kumme is en ur-eschte Pälzer Ausdruck fer zurecht kumme.
- Un Mazissle sinn Gänseblümelcher, des misst mer als guter Pälzer eigentlich wisse.

So, des war's mit de Lesunge vun letschtmol, jetzert gebt's widder vier neie escht-pälzer Wörter:
    

Kriecher

Traktor
Krabbeltier
Mensch, der auf allen Vieren geht

Wettstäänich

glitschiger Stein
nicht durchbackener Kuchen
Weisheitszahn

Hunnertkrawwler

Rübenerntemaschine
Tausendfüßler
aufdringlicher Mann

Vielläppscher

Feldsalat
sorgenfreie Person
Hundeknochen

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"

Denken dro: 's gibt was zu gewinne am Enn vum Johr (was, des dun mer erscht schbeeder verrode...)

 
An dere Schtell misse mer uns bei zwää Leser besonders bedanke, alldieweil nämlisch die vier Rätsel vun dere Woch vun ihne schtammen: Also, vielen Dank an Christian K. un an Dennis G.!
Do nun die aktuell Ranglisch aus unsre Sproochpriefung:
(Jedes rischtische Wort gibt 1 Punkt, die Orte kummen erscht im November dezu...)
 
 
Platz Name Punkte Teilnahmen
1 Stefan Weis 17 5
2 Tanja Jacob 14 4
3 Alex Korz 7 2
4 Jörg Scherer 3 1
Sebastian Zipp 3 1
Wie aus dere Lischt zu entnemme is, hänn mer uns vor Teilnahme nimmie rette gekinnt ;-), desdeweche machen schää all mit, dann wärrd die Sach noch schbannender!

- Pälzer Schimpfwerder - Dääl zwölf-
So, ach fer die Woch hänn mer mol widder e paar "schääne" pälzer Werder ausg'sucht. Do sinn se:
Aafänger Des is ähner, der ebbes nei gelernt hot un sich noch saubleed oostellt
Chores So dut mer e Osammlung vun net ganz zivilisierte Leit nenne
Iddi Abkerzung fer Idiot
Mollekopp Des is en schdure Mensch odder ach ähfach bloß en Dickkopp
Quacksack Nix annres als en Schreihals, denn lauder geht's nimmie
Schlot So bezeichent mer en nichtsnutzige Kerl
So, die nekscht Woch gebt's widder die Eschtler, awwer des dauert halt noch siwwe Daach... (wirklich!)

- Witze -
Heit mol bloß ähn Witz:
De General dut soine Truppe befehle, dass die die Feschdung kreisförmich umzingle sellen. Noch ähm Daach kummt de Oberst zum General un saacht, dasses net mechlich war, die Feschdung kreisförmich zu umzingle. Ganz erbost iwwer die Ufähichkeit froocht de General: "Unn warum hänn er des net uff die Reih gebroocht?" - Dodruffhie saacht de Oberst: "A weil die Feschdung viereckich is...."
Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!

Do nun die Weisheit der Woche: << Ball isses Vertel vun de Hunnert g'schafft>>
Wann ehr net wissen, was des hääßt, in zwää Woche sinn ehr schlauer...
Des war's jetzert fer di Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem
 

ZURÜCK ZUR ARCHIV-ÜBERSICHT