SO, DO ISSE WIDDER, DIE ALLSEITS SO BELIEBTE  PALZ-POSCHT!
JETZERT NEI: DIE PALZ-POSCHT 16/2000
Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...


Rausgewwer: RdPS (Retter der Pälzer Sprooch)
Schefschreiwer: Walz vun de Palz
Schreiwer: Hotzeplotz, Schtummel, Tschingel-Belz



Unser Motto vun dere Woch hääßt:
<<< Do simmer widder!!!! >>>


Sodele, do simmer widder! Wie schunn lang erwaht, do isse nun, die Palz-Poscht 16/2000! Wie ehr sischer bemerke dun, hänn mer einische neie Rubrike in die Palz-Poscht uffgenumme, so zum Beischbiel en neie Eschtler-Bericht un en Bericht iwwer die Palz. Leider hot sisch des Problem mit unsere Abschdimmung iwwer die Pälzer Sproochpriefung als äußerscht kompliziert dagschdellt, so dass mer desmol noch verzichte missen (ach noch etliche Versuche hot die Sach net ooschdännich geklappt, die Oozeich war sogar manchmol unner aller Sau, desdeweche missen mer noch kräftich werkle..., mer versuchen awwer 's Bescht drauß zu mache!) Ansunschde winschen mer eich viel Schbass beim lese un sinn fer neie Vorschlääch dankbar!


Terminänderung

Als erschdes missen mer eich mol mitteile, dass es uns nimmie mechlich is (aus zeitliche Gründe) die Palz-Poscht immer am Samsdaach morsche zu verschicke, desdeweche gibt's die neie Ausgawe dann bis schbeedeschdens Sunndaach Middaach, so dass ehr dann awwer trotzdemm rechelmäsisch beliffert wärrn. Mer hoffen, ehr bleiwen uns trotzdemm treu un winschen eich noch e viel Frääd bei de nekschde Ausgawe, wu noch kumme dun...



Aktuelles zur Reschtschreibreform

Do säänen ehr's! Kaum is se do, is e ach schun widder weg - zumindescht fascht. Die Reschtschreibreform, so genial odder uugenial se ach war, is bei de meischte Leits net so beliebt. Un 's dauert sischer nimmie lang, do gebt's widder e Reform vun de Reform, un dann wahrschoins nochemol e Reform... un so weiter.
Awwer mer, 's Palz-Poscht-Tiem, hänn des naderlisch vun Ofang o kumme seh' un hänn uns desdewesche ach gar net erscht dro g'halte. Im Grunde war die Reform sowieso iwwerflissisch, alldieweil mer Pälzer "dass" schunn immer mit zwää "s" gschriwwe hänn, odder hänner in de Palz-Poscht schunn emol was anres g'sääne? Un Trennungsreschle? Des is uns ach egal, ob do jetzert die alt odder die nei Reschelung gilt, alldieweil mer sowieso nie trenne dun - mer kennt jo debei en Fehler mache...
Mer Pälzer lossen uns halt bei unsre Sprooch un bei unsre Schreibweise net ins Handwerk pfusche - Pälzisch bleibt Pälzisch, do ännert kä Reform was dro!



Die Palz

Mer, 's Palz-Poscht-Tiem, hänn uns in de Summerpaus mol widder ordentlisch 's Hern ausgedrickt, um e paar neie Idee zu krieche, was mer eich dann noch so alles beibringe kinnen. Do is uns uffgfalle, dass mer schunn e halwes Johr die Palz-Poscht verschicke dun, ohne mol genau g'sacht zu hawwe, was die Palz iwwerhaupt is.
Zwar misst des vun eich eischentlisch jeder wisse, awwer vielleischt gebt's drauße, in de große weite Palz, doch noch e paar Unnerbelischtete, die kä Ahnung
hänn. Deswesche gebt's desmol e klääni Unnerischtsschtunn fer alle Uugebildete:

Unner dem Begriff >PALZ< verschdehd merr de gsamte linksrheinische Raum zwische de Wieslauter im Süde, 'm Rhoi im Oschde, de Blies im Weschde un de Nahe un Mosel im Norde, also korz: de Süddääl vun Rheinland-Pfalz.

Dodemit hämmer jetzert mol geklärt, wu die Palz lische dut (sollt irschendänner Oiwend do degesche hawwe, soll er sich bei uns unner Redaktion@Palz-Poscht.de melde).

Als zwättes wolle mer mol uff die Sprooch e bissl genauer oigehe: Irschend wann hot mol en Gelehrte g'sacht (froochen misch jetzert net, wer des war - isch glaab, er hot mit Nochname Becker g'hääße), dass 's gar kä Pälzer Mundart gewe det. Er hot nemlisch gemäänt, dass es allerhekschtens 750 odder mehr verschiedene Dialekte gebt, alldieweil in jedem Dorf annerscht gebabbelt werd. Der Satz stimmt naderlisch nur zum Dääl: Zwar hot der gute Mensch net ganz uurescht, wenn er saacht, dass in jedem Ort e bissl annerscht gered werd, awwer desdewesche glei zu behaupte, 's gäb gar kä Pälzer Sprooch, geht naderlisch net! Des losse mer uns net biete! Deshalb an dere Schtell jetzert die Klarstellung: Pälzisch werd iwwerall dort gebabbelt, wu sisch die Leit Pälzer nennen. Zu dene regionale Unnerschiede kann isch eich grad mol korz e Beischpiel nenne:
In de Vorderpalz, also do wo mer, 's Palz-Poscht-Tiem, dehääm sinn, gebt's e ganz klari "Sproochgrenz": Die Linie verlaaft ziemlisch genau dursch Muschbach. Südlisch vun Muschbach saachen die Leits "Es reschent!", nördlisch devun hääßt's "Es reijent!". Awwer deten ehr deswesche saache, die äänd Hälft wärn kä Pälzer? Isch denk, mer verstehn uns ach so!
Ehr wissen jo:
Palz bleibt Palz, Gott erhalt's!


- Pälzer Sproochpriefung -

So, do sinn die Uffleseunge vun de Frooche vor de Summerpaus:

- Krümel sinn Brossle, odder umgekehrt, 's is uff jeden Fall 's ähn un selwe.
- Was e Schlopp (odder ach ähn Schlopp) is dirft eichentlich jeder wisse, falls net, 's is e Schleife!
- Wann eich e schelmisches Mädche iwwer de Wech laaft, dann war des e Schinoos.
- Un zu guter letscht: wann ebbes schofel is, dann isses verwerflich.

Un, war doch desmol gar net so schwer?



So, des war's mit de Lesunge vun letschtmol, jetzert gebt's widder vier neie escht-pälzer Wörter:


Belzenickel
Pelzmantel
Nikolaus
ehem. pfälzische Währung
Gorchelknopp
Hemdsknopf
Spitze des Spargel
Kehlkopf
Duwaksdoos
Bienenkasten
Tabaksdose
Überdosis
Aldi
allg. bekannte Anrede für die Ehefrau
großer dt. Discountmarkt
Kurzform für alldieweil

So, isch hoff, dass die Werder net zu schwer waren (so als kläänie Oischdimmung). Des mit de Abschdimmungsfunktion klappt halt noch net so, wie's soll, awwer mer kriechen des garantiert hie!


- Die Eschtler  - Kultur un G'sellschaft-
Dank intensiver Sproochstudie in de zwäämonatische Summerpaus fiehlt sisch unser Soziologe, de Dr. Dr. Prof. Klaus Konfuzius, jetzert in de Lage, soi Abhandlung iwwer die Eschtler in Pälzisch zu schreiwe. Dann wärrn mer mol sääne, was er nach fuchzeh Ausgawe Palz-Poscht gelernt hot:

Dääl ähns:
Jetzert, nochdem isch fascht e halwes Johr bei de Eschtler zugebrocht hab, seh isch misch dezu verpflischtet, moi Erkenntnisse iwwer des Völksche an die Nachwelt weiterzugewe. Als Omerkung sei mer gschtattet, dass ' s ohne die Mithilf vun em ganz beschtimmte Eschtler gar net gelunge wär, die Abhandlung zu verfasse (wenn derjenische des liest, werd er hoffentlisch wisse, dass er gemäänt is). Als allererschtes will isch mol e korzi allgemeini Iwwersischt gewe:
Eschtl is e klännes Dorf, des westlisch vun Lambrescht mitte im Pälzer Wald lischt. Die Population vun de Eschtler werd uff uugfähr 1500 Schtick gschätzt, e besonderi Verännerung in de Bevölkerungszahl is net zu verzeischne, sodass mer devu ausgehe kann, dass die Rass trotz ihrer Einzischartischkeit net vum Ausschterwe bedroht is.
Geh mer jetzert mol zu ännre genauere Betrachtung iwwer:

I) Soziale Schichtung

Die soziale Schichtung is in Eschtl noch in em ziemlisch primitive Stadium un mer kann eigentlisch känns vun de bekannte Schichtungsmodelle owende.Bei ännre genaue Betrachtung kann mer feschtschtelle, dass es e paar Eschtler gibt, die e gewisses Osehe bei ihre Miteschtler hänn: So steht am Kopf vun de Eschtler än Owwereschtler, genannt "Luchs", der die Roll vun em owwerschte Entscheidungsorgan oinimmt. In Streitfäll un bei allgemeiner Ratlosischkeit is er derjenische, der saacht, wu's lang geht. An soine Seit steht noch der Rat der Weißen, des is e Grupp, die sisch aus de Dorfälteschte zusammesetzt (deswesche ach der Name: Weiß sinn vor allem ihr Hoor...). Oft wärrn erscht die um Rat gfroocht, bevor de Owwereschtler vun soine Unnertane beläschtigt werd.Des äfache Volk spaltet sisch dann in zwää Lager: Uff de ände Seit die westlische Sippe (Jääscher, Sammler), uff de andere Seit die östlische Sippe (Kriescher, Holzhacker). Beide Sippe wärrn jeweils vun em Ofiehrer befehlischt, die zwää Ofiehrer selbscht unnerschtehn dann awwer widder direkt 'm Owwereschtler. Vertikale Mobilität is somit in dere G'sellschaft fascht gar net vorhande, wer als Sammler gebore is, werd ach immer Sammler bleiwe.

So, des war's fers erschte emol, isch meld misch nekscht Woch widder mit de Fortsetzung vun "Die Eschtler - Kultur un G'sellschaft".
 



- Witze -

Nochdemm des abgebrennte Haus widder uffgebaut worre is, liegt halt en Haufe Erd vum Ausschachte drummrumm. De Bauherr sieht denn Haufe un kratzt sisch am Bart: " Wohie soll isch dann mit demm ganze Grund?" De Hilfsarbeiter am Bau wääß naderlich glei die Lesung: "Wissen Se was? Mer grawen e diefes Loch un schmeißen de Grund dann dort noi."

De Määschder zu soim Lehrbu: "Wie oft sell isch der noch saache, dass du net bei de Ärwed peife sellschd?" - "Awwer Määschder, isch du doch gar net schaffe..."

Falls ehr Witze kenne duen un mechden, dass die in de Palz-Poscht vereffentlicht werrn, schreiwen an Redaktion@Palz-Poscht.de , mer wern eich dankbar!



- Pälzer Woifeschde -

So, in de Summerpaus hänn ehr ohne unser Termine auskumme misse, deshalb hoffe mer, dass ehr inzwische net verdorscht sinn. Do sinn awwer jetzert widder unser Termine fer die nekscht Woch:


18.08.2000 - 22.08.2000 NW-Gimmeldingen: Gimmeldinger Woikerwe
18.08.2000 - 22.08.2000 NW-Diedesfeld: Woikerwe
18.08.2000 - 22.08.2000 NW-Lachen: Baure- un Winzerkerwe
18.08.2000 - 22.08.2000 Hainfeld: Woikerwe

Wie immer gilt: Die Uffstellung erhebt känn Ospruch uff Rischtischkeit un Vollständischkeit!
Jetzert wolle mer eich noch en besondere Service biete: Alldieweil jo in letschter Zeit 's Wetter fer Woifeschte oft net ganz so gut war, gebt's vun uns heit die Wettervorhersaach fer'd nekscht Woch: 'S wärd besser, reschent (odder reijent) nimmie so viel und die Sunn kummt öfters mol raus*.
*Wettervorhersaach ohne Gewähr


An dere Schdell schdeht je fer gewähnlich 's Wort fer Insaider. Leider hänn mer jetzert e kläänes Problem, alldieweil des Wort dann wahrschoins nur zwää odder drei Leit kenne deeden, desdeweche do unsern Uffruf: Schreiwen un schicken uns Werder, die mer an dere Schdell platziere kinnen, denn mer wollen des Wort fer Insaider dann in "Wort der Woche" umbenenne, so dass sisch dann hoffentlich jeder demit identifiziere kann!
Schicken eier Vorschlääch bitte an: Redaktion@Palz-Poscht.de

Do nun 's Wort der Woche: << E-Poscht-Probleme >>

Des war's jetzert fer di Woch mit de Palz-Poscht. Mer hoffen, die Palz-Poscht hot eich widder g'falle un mer hoffen, dass mer so weidergemacht hänn wie bisher Falls ehr Verbessrungsvorschlääch hänn, schreiwen uns, mer sinn fer jedie Orechung dankbar!
Eier Walz vun de Palz
un soi Tiem

 

ZURÜCK ZUR ARCHIV-ÜBERSICHT