SO, DO ISSE WIDDER, DIE ALLSEITS SO BELIEBTE  PALZ-POSCHT!

JETZERT NEI: DIE PALZ-POSCHT 10/2000

Die E-Poscht is jetzert an alle gericht', känner braucht mehr drauße zu bleiwe, alldieweil die "Nichtpfälzer" noch viel lerne missen...

Rausgewwer: RdPS (Retter der Pälzer Sprooch)

Schefschreiwer: Walz vun de Palz

Schreiwer: Hotzeplotz, Schtummel, Tschingel-Belz


Unser Motto vun dere Woch hääst:

<<< Mer sinn widder do! >>>


Do isse widder, die allseits so beliebte Palz-Poscht! 
Wie ehr wahrschoins schunn gemerkt hänn, gebt's mit dere zehnte Ausgaab ach e 
neies Erscheinungsbild. Mer hoffen, dodemit die Palz-Poscht noch attraktiver zu 
mache un eich noch mehr Freud zu bereite.
Wie schunn in de letschte Ausgaab erwähnt worre is, hänn mer eich nach dem 
letschde Wochenend viel zu verzehle. Was genau, des kennen ehr am Schluss vun 
dere Ausgaab nochlese. Lossen eich Zeit beim Lese un Genieße un wie immer gilt: 
Wenn ehr zu irschendwas Frooche hänn, dun uns grad e korzi E-Poscht an 
redaktion@Palz-Poscht.de schicke un ehr kennen sischer soi, dass ehr ach Antwort 
bekummen.


- Pälzer Sprochpriefung - 

Un wie ehr's jetzert schunn gewähnt sinn, als allererschtes gebt's in de 
Palz-Poscht die Ufflesunge vun de Pälzer Sprochpriefung (un zwar die vun de letschte Ausgaab):

-Als erschtes hämmer eich gfroocht g'hatt, was en Barablie is. Naderlisch is des en Rescheschirm, wie jeder gute Pälzer wääß.
-Un Feez is ganz efach Spaß un nix anres.
-Deeringle hot nix mit raufe odder zurickziehe zu du, 's hääßt nämlisch nötige.
-En Stenz is ääner, der ganz schää eitel is, hot also net emol im entfernteschte was mit em Haseschwanz oder ännre Stanz zu du.


Weiter geht's an dere Schdell mit vier neie Pälzer Werder, die ehr eischentlisch 
all kenne sollten, wann ehr rischtische Pälzer sinn:

geschnackelt:

gesalzen
geklappt
geziert

Gewidderverdähler:

Blitzableiter
breitkrempiger Hut
cholerischer Mensch

Grusselbeere:

Himbeeren
Gewürzbirnen
Stachelbeeren

Quasselstripp:

Telefonleitung
Meerestier
Dauerredner

Wann ehr jetzert mähnen, ehr hätten alle Werder gewisst, ähfach die rischtisch Lesung ooklikke un dann uff ABSCHICKE klicke. In de nekschde Ausgab dun mer dann die Ergebnisse veröffentliche, ehr wärn naderlich net namendlich erwähnt, außer wann ehr des wollen. Wann ja, dann schreiwen eiern Name in des Feld unner demm Text. Wie saacht ähn beriehmte Fussballer: "Schaun mer mal!"


Witze

So, als nekschdes widder unnsre beriehmte "Schenkelklopfer"!
Zur Feier des Tages gebbt's mol zwää Schdick, un zwar desmol Saarlännerwitz. Also dann: immer schää lache!

Ähnes Owends landen Auserirdische mit ehrm Raumschiff genau uff de Grenz zwische de Palz unnem Saarland. Dann holen se sich fer Versuchszwegge zwää Leit mit uff's Raumschiff. Ähn Pälzer un ähn Saarlänner. Dodenoch schneiden se demm Pälzer de Schädel uff un sähnen, dass de ganze Schädel voll mit Hernmasse is. Do denken se sich, dass se de Schädel liewer widder zumache dun, alldieweil des alles zu kombliziert is. Dann schneiden se de Schädel vum Saarlänner uff un innedrin sähnen se nur zwää klänne Drähd, die in de Midde z'sammegeknibbelt sinn, schunscht nix. Jetzert iwwerlechen se naderlich fer was die Drähd sinn. Was machen'se schließlich: sie schneide die zwää Drähd auseinanner. Un was bassierd: die Ohre fallen ab!

Der "Schenkelklopfer" is net vun uns, sondern vum Ridder Tschu, ähm begnadede Palz-Poscht-Leser. Dodezu fallt uns bloß noch ähns oi: Merrsi!

Ach de nekschde Witz is net vun uns, sondern vum Wolfgang W., der ach ganz begeischdert vun de Palz-Poscht is, deshalb ach an ihn: Merrsi!

Was isses ähnzigschde Schild, wu emm erlaubt, uff de Audobahn zu wende un in die anner Richdung weiderzufahre? - "Willkommen im Saarland"


Ergebnis vun de Ummfrooch

So, alldieweil mer so viele Vorschlääch uff die vun uns ins Lewe gerufene Ummfrooch kriecht hänn, mecht'n mer die eich jetzert mol präsentiere un zur Abschdimmung freigewwe. Ähfach des Word ooklicke, des eich am Beschde gfallt. Wann viel mitmachen, dann hoffen mer e gscheides Ergebnis zu krieche un kää Schdichwahl durfiere zu misse. Also dann gebben mol eier Meinung ab, denn in de Palz isses schließlich so: ähn rischdische Pälzer reißt zu jedem Problem soi Gosch uff!

Mehrzahl vun PALZ-POSCHT

Palz-Poschte Palz-Poschtees Palz-Pöschder
Palz-Pöschte Palz-Poschtusse Palz-Poschtee
Palz-Poschtse Palz-Poschter Palz-Poschtices
Palz-Pöschtse Palz-Poschti Palz-Poscht
Palz-Poschtulate Palz-Poschtae Palz-Poscht-Ausgawe

Mehrzahl vun E-Poscht

E-Poschte E-Poschtees E-Pöschder
E-Pöschte E-Poschtusse E-Poschtee
E-Poschtse E-Poschter E-Poschtices
E-Pöschtse E-Poschti E-Poscht
E-Poschtulate E-Poschtae EPS
E-Nochrichte

So, als letschdes gewwen bitte noch eiern Name in des unne stehende Feld oi, damit jo känner doppelt abschdimme dut. Sicher is sicher...!


ABI-Fahrt nach Frankreisch

So, alldieweil die Palz-Poscht jo etwas "lang" worre is, gibt's zum Schluss de verschprochen Bericht vun ähnre klääne Rääs nach Frankreisch...


Wie schunn owwe erwähnt, mer hänn eich desmol ganz schää viel zu verzehle. Es misst jo eischentlisch schunn jeder mitkriecht hawwe, awwer fer all die, die wu's noch net wisse dun, jetzert nochemol: Vum Freidaach, de zwölfde Mai, bis zum Dienschdaach, de seschzehnde Mai, warn mer, also die Abiduriende vum LG in Neistadt, in Gérardmer (Frankreisch) uff'm Kämbingplatz zelte. Do kennen ehr jetzert unser Schtorrie lese:

ABI-FAHRT nach Gérardmer

Zuerscht misse mer mol klarstelle, dass mer, die Palz-Poscht Schreiwer, norre vum Samschdaach bis zum Mondaach debei warn un desdewesche ach norre iwwer die Daache berischte kennen. Des langt awwer trotzdem, um do e paar Seite zu fülle...

Am Samschdaach morschen hänn mer dehääm 's Audo vollgepackt (awwer so rischtisch vollgepackt; viel hätt nimmie noigepasst) un hänn uns uff de Weesch nach Frankreisch gemacht. Als mer dann iwwer de Grenz (odder des, was noch devu iwwrisch is) warn, sinn mer uff fascht leere Audobahne mit 130 (wesche denne dabbische Gschwindischkeitsbegrenzunge) dahingezuckelt. Nach drei Schtunne Fahrt hämmer's dann endlisch gschafft g'habt: Okunft in Gérardmer. Unsern Kämbingplatz war e paar Kilomeder außerhalb vun de Stadt in de Näh vun so em See gelesche. Kaum ware mer do, hot's ach schunn ogfange, zu reschne. Ob mer des dabbische Wetter mitgebroocht hänn? Des folschende Gewidder war awwer zum Glick norre korz un hot unser guti Laune net vertreiwe kenne. Feucht wär de Owend sowieso worre, ob jetzert vun auße odder vun inne...

 Zwischedorsch hot's dann en Kontescht beim Holzhacke gewwe: De Lamberwambe (die wu debei warn, wärn wisse, wer gemäänt is) hot um zwanzisch Mark gewett, dass er mit em klääne Beil in ännre Schtunn en Holzbääm mitm Durschmesser vum em halwe Meter durchhacke dut. Schafft er's net, geht er in de Bach, der in de Näh an unserm Zeltplatz vorbeigflosse is, bade.

De Racker vum Grummbeeracker

Sie nennen ihn "Lamberwambe"

 Jo, was soll mer sache: Nach zeh Minutte hot er uffgewwe un is freiwillisch bade gange (bei ännre Wassertempratur vun 4 bis 5 Grad!). Awwer en Depp hot gemäänt, de Lamberwambe is noch net nass genuuch un hot en extra nochemol nassgschpritzt. Die Antwort in Form vun e paar Liter Wasser is vum Lamberwambe naderlisch ach glei widder zurickkumme un 's End vum Lied war, dass alle, die drumrum gschtanne warn, nass worre sinn. Vielen Dank, Tsch...!

De Ofang...

... un's Enn vum Lied!

 'S Feier, wu mer unser schääne Schteeks gegrillt hänn, hämmer aus rischtisch schää nassem Holz gemacht, domit's ach oschtännisch raache dut. Mit unserm Schadstoffausstoß hätte mer dodebei wahrschoins jedre Müllverbrennungsanlaach Konkurrenz mache kenne. Nach'm Esse isses dann rescht lusdisch worre: Naderlisch war genuuch Alkohol debei, wahrschoins hätt mer dodemit e ganzes Regiment uuschädlisch mache kenne. Mer wollen jo do jetzert ach kä Name nenne, awwer manch ääner war so zu, dass er nimmie gewisst hot, was soi Zelt is. Um dreie nachts isses dann endlich e bissl ruhischer worre un mer hot mol ans Schlofe denke kenne. Awwer lang hämmer kä Ruh g'hatt: Um sechse morschens sinn mer vun Gschtöhne un Gejammre aus'm Nachbarzelt widder uffgewacht: "Ohhh. Geht's mir soooo schlecht..." Un jetzert war mer halt wach, nochemol rumdrehe un weiterschlofe hot kän Sinn g'hatt, alldieweil uns vun dene drei Schdunn im Zelt sowieso schunn alle Knoche wehgeta' hänn. Do sinn mer halt uffgschtische, awwer nach ännre warme Dusch hot die Welt schunn widder viel besser ausgseh. Un äns kann isch eich saache, unser Zeltplatz hot am Morsche ausgseh wie nach em Bombeagriff. Isch glaab, 's hot känn Quadratmeter mehr gewwe, wu kä leere Dose un Flasche gelesche hänn. Zwää Schtunn, nachdem mer uffgschtische sinn, sinn dann ach die erschte Gschtalte aus de annre Zelte erschiene. So wie die ausgseh hänn, konnt mer se irschendwu zwische Lebe un Tod oischtufe. De Daach war eischentlisch ziemlisch ereischnislos: 'S war schäänes Wetter un alle hänn sisch e bissl gsunnt (der Sunnebrand am näkschte Daach war net zu verachte!).

Des brennt vielleicht....!!!

  Gesche Owend is mer dann widder zu de Daachesordnung iwwergange un hot ogfange zu saufe (was ach sunscht...). Un wer nach'm letschte Owend gedacht hot, 's kännt nimmie schlimmer kumme, hot sisch gedeischt. Irschendwie hot in de Nacht kaum änner mehr so rischtisch geplant, was abgeht. E paar hänn dann gemäänt, sie missten unner Beweis schtelle, dass sie ach im Vollrausch noch Fussball schpiele kennen. Des hot dann in etwa so ausgseh: Änner hot immer die Fackel iwwer de ruhende Ball g'hoowe, damit mer den sehe konnt. En Zwääte hot dann Alauf genumme, is uff de Ball getrete un rickwärts widder umgekippt. Dann hot's noch weitere zwää Leit gebraucht, die demm widder hoch g'holfe hänn. Dass se sisch 
dodemit ziemlisch lächerlisch gemacht hänn, hot se, glaab' isch, nimmie so interessiert.

Erschd die Mischung, ...

... dann das Vergnügen!

Es gäb jo noch viel solsche Gschichtelsche zu verzehle, awwer dodefier langt die Zeit gar net. Do norre e paar Schtischwörter: De Tanz uff 'm Feier, Wettkotze, Beilwerfe usw... Zu de folschende Nacht wär noch zu saache, dass se genauso kurz war wie die vorherisch. Am näkschte Morschen hänn mer uns dann widder uff de Weesch in Rischtung Heimat gemacht un er glaawen gar net, wie froh mer waren, widder in unsre eischene Bette zu lische. Des Kreizweh wärd uns noch e paar Daach an den Ausfluuch erinnre...

Awwer die Hauptsach is: Mer sinn zurick in unsre geliebte Palz!

Des war en Berischt vun unserm Schreiwer Hotzeplotz, der zusamme mit unserm 
Schefschreiwer, de Walz vun de Palz, des Wochenend heldehaft iwwerschtanne hot.


So, des war's mol widder. Jetzert wissen ehr all, was bei unsre Abi-Fahrt so alles passiert is, sozusaache sinn ehr jetzert all Insaider. Ach ja, wenn isch des Word do grad schreib, ebbes fehlt jo noch:

Des Word vun de Woch fer Insaider hääst: << Lamberwambe >>


So, des war's awwer endgültisch. En Gruß an alle Pälzer in diesem Land un ach an 
all die, die wu's noch wärre wolle, wünscht eich

Eier Walz vun de Palz
un soi Tiem.

 

ZURÜCK ZUR ARCHIV-ÜBERSICHT